Interi do të presë në “San Siro” Benfican për të bërë llogaritë e kualifikimit në gjysmfinalen, pasi do të zhvillojnë mes tyre çerekfinalen e kthimit në Champions League. Zikaltërtit pavarësisht momentit jo që po kalojnë në Serie A, kanë epërsinë e 2 golave ndaj portugezve nga takimi i parë.
Në konferencën për shtyp për të analizuar këtë përballje foli trajneri Simone Inzaghi, i cili theksoi se të tijtë kërkojnë kalimin në gjysmëfinale, por për ta arritur këtë duhet një lojë fantastike ndaj një ekipi që ka shumë vlera.
“Ne e dimë se ndeshja e kthimit është shumë e rëndësishme edhe pse jemi në avantazh. Ne e dimë vlerën e saj, ne duhet të jemi mirë për ta kapërcyer atë dhe të jemi të vetëdijshëm se mund të jemi në mesin e katër më të mirëve të Europës.
Ajo që ne kemi bërë është e kotë ta kujtojmë, megjithatë e dimë që në kampionat nuk jemi në situatën që do të dëshironim. Fokusi është te Benfica, ne kemi një avantazh për të menaxhuar. Duhet të luajmë një lojë në mënyrë më të mirë, kundër një ekipi me vlera.
Sa i përket ndeshjes së nesërme, ne vijmë nga një humbje në shtëpi që na uli pak moralin, por tashmë kjo është e kaluar për ne. Jemi të fokusuar te skuadra që do të ndeshemi nesër, pasi do të jetë një ndeshje shumë e vështirë. Ata janë intensivë, ata vrapojnë shumë. Ne duhet të jemi mirë në mbrojtjen e çdo pjese të fushës për t’i bërë ata sa më pak të rrezikshëm”, ka theksuar italiani.
