Tirana u trondit mbrëmjen e djeshme nga një ngjarje e rëndë që ndodhi në rrugën e Dibrës, ku një 20-vjeçar u vra nga dy të rinj, të cilët i kishin zënë pritë.
Stivën Toshkëzi humbi jetën pasi u godit me thikë nga Aksel Hoxhaj dhe miku i tij Ensi Maze dhe sherri me një viktimë ka ndodhur për shkak të një vajze. Gjatë ditës u mësua se ishte Hoxhaj ai që kishte shkaktuar nisjen e një konflikti me të ndjerin, pasi ngacmonte të dashurën e Toshkëzit.
Para disa ditësh të rinjtë kanë pasur edhe një konflikt fizik, ku Stivën Toshkëzi i ka rrahur Ensi Mazen dhe Aksel Hoxhajn në afëtrsi të “Rrugës së Elbasanit”.
Ndërkohë, gazetarja Klodiana Lala ka zbuluar në emisionin “Open” se të rinjtë e kishin lënë që të takoheshin mbrëmjen e djeshme për t’u sqaruar, por Toshkëzi ra në pritën e dy 18-vjeçarëve.
Ajo tregoi se dy autorët i zunë pritë 20-vjeçarit pasi ai la punën si montazhier në një televizion në kryeqytet dhe po kthehej në shtëpi me një mik.
Njëri prej autorëve ka mbajtur shoferin, ndërsa tjetri ka goditur Toshkëzin me një hanxhar ose thikë të madhe në pjesën e brinjëve duke i shkaktuar vdekjen.
“Nuk e kemi edukuar rininë që të mos shkojë direkt te thika. 20-vjeçari punonte në një televizion dhe përkushtohej në punën e tij si montazhier. Dy djem i kishin ngacmuar të dashurën dhe kishin pasur një konflikt. Mbrëmjen e kaluar sapo ka lënë punën dy persona i kanë zënë pritë dhe njëri mbajti shoferin dhe tjetri e goditi me hanxhar apo thikë të madhe në pjesën e brinjëve. Babai i tij sot do nisej në SHBA sepse kishte fituar lotarinë dhe familja do bashkohej me të më pas”, zbuloi Lala.
