Më pak se një muaj na ndajnë nga zhvillimi i zgjedhjeve lokale të 14 majit dhe forcat politike pjesëmarrëse në proces ashtu si edhe KQZ janë duke bërë përgatitjet e fundit para shprehjes së vullnetit të qytetarëve për qeverisjen vendore.
Teksa kreu i KQZ ndoqi sot nga afër testimin e sistemit elektronik të votimit dhe numërimit në bashkinë e Elbasanit dhe pritet publikimi i fletës së votimit për çdo bashki, një kërkesë ka mbërritur në KAS nga koalicioni “Bashkë Fitojmë”.
Koalicioni opozitar kërkon që në fletën e votimit për kryetarët e bashkive të mos përfshihen emblema apo logo të partive politike apo të koalicioneve.
Më tej në kërkesë arhgumentohet se qytetarët do zgjedhin kryetarin e bashkisë dhe jo kryetarin e ndonjë partie politike siç ç’ndodh në zgjedhjet e përgjithshme ku kandidatët identifikohen me partinë apo koalicionin që i ka propozuar.
“Së pari jemi përpara zgjedhjeve të pushtetit vendor, ku qytetarët shqiptar do të zgjedhin kryetarin e tyre të bashkisë respective dhe jo kryetarin e ndonjë partie politike. Së dyti, nuk jemi përpara zgjedhjeve të përgjithshme ku kandidatët identifikohen kryesisht me partinë apo koalicionin që i ka propozuar me listë shumë emërore. Së treti, praktika e KQZ për zgjedhjet e kaluara për fletën e votimit për kandidatët për kryetar Bashkie ka qenë e tillë që nuk ka pasur logo partie apo koalicioni”, thuhet në dokument.
Sipas “Bashkë Fitojmë”, kryekomisioneri nuk e ka marrë parasysh këtë propozim, për pasojë kanë vendosur që t’i drejtohen KAS.
