Më shumë se 100 kilogramë kokainë u kapën në një anije mallrash që ishte ankoruar në Husnes të Norvegjisë.
Gjatë operacionit, Shërbimi Doganor Norvegjez, në bashkëpunim me rojet bregdetare dhe policinë, zbuluan drogën e cila ishte fshehur në një anije mallrash që vinte nga Amerika e Jugut.
Gjatë operacionit natën e së enjtes më 13 prill, në Husnes në Kvinnherad, u arrestuan 5 meshkuj dhe 1 femër, të gjashtë janë nga Shqipëria, të moshës 20-40 vjeç. Policia beson se personat përbëjnë një grup të organizuar kriminal.
Shqiptarët, sipas raportimeve mediatike, kanë qëndruar në Norvegji vetëm disa ditë para se të arrestoheshin pas zbulimit të sasisë së drogës. Një pronar në zonën e Rosendal ka thënë se katër persona hynë në një nga shtëpitë që ai dha me qira të martën.
“Këtu shohim se si anijet e mëdha përdoren për të transportuar drogë nën vijën ujore, shpesh pa dijeninë e ekuipazhit”, thotë menaxheri i zonës Bård Ynnesdal në Departamentin e Doganave. Sekuestrimi vlerësohet si kapja më e madhe e kokainës në Norvegjinë Perëndimore dhe renditet ndër konfiskimet më të mëdha të kokainës në shkallë vendi.
Sipas “RUSinfo”, kokaina ka një çmim në rrugë ndërmjet 800 dhe 1200 NOK për gram. Kjo do të thotë se konfiskimi në Husnes ka një vlerë prej rreth 100 milionë NOK të shitura në rrugë.
