Një 28-vjeçare është shpëtuar nga kthetrat e krimit, teksa ishte rrëmbyer, mbajtur peng për një javë dhe dhunuar në mënyrë barbare në rrugën “Frosina Plaku” në Tiranë.
E reja ka dhënë dëshminë e saj nga Spitali i Traumës duke treguar detaje të tmerrshme nga dhuna e përjetuar prej një javë deri te denoncimi i bashkëjetuesit Gleard Gusholli, 31 vjeç.
“Glearti me ka dhunuar me këmbë karrigeje, me godiste me shkelma dhe grushte. Kam tentuar të hidhem nga i pestë nga dhuna”, ka thënë e reja në një prononcim për mediat.
Avokati mbrojtës i saj Enea Cenko ka kërkuar mbrojtje për klienten e tij. “Drejtësia të flasë për rastin, kërkojmë mbrojtje dhe siguri për jetën e vajzës”, ka deklaruar Cenko.
28-vjeçarja iu nënshtrua ndërhyrjes kirurgjikale pas dhunës barbare të Gleard Gushollit.
31-vjeçari Gusholli mbajti të mbyllur dhe dhunoi barbarisht një javë me radhë bashkëjetuesen e tij 28 vjeçare. Ishte ndërhyrja e policisë ajo që parandaloi një tjetër viktimë të mundshme.
Gjithashtu, në banesë hetuesit gjetën edhe mjete që përdoren për konsumimin e lëndëve narkotike dhe mbetje të kokainës, çka ngre dyshime se në momentin e kryerjes së krimit, 31-vjeçari i cili nuk ka dhënë shpjegime për motivet ka qenë nën efektin e drogës.
Ndërkohë në pranga kanë rënë:
Gleard Gusholli, 31 vjeç, bashkëjetuesi i vajzës se dhunuar
Besmir Nurçellari, 36 vjeç, nuk kallëzoi krimin dhe fshehu provat
Arjan Sheta, 41 vjeç, nuk kallëzoi krimin dhe fshehu provat
Bledi Kateshi, 27 vjeç, largoi Gushollin nga vendi i ngjarjes
Erlind Kateshi, 42 vjeç, largoi Gushollin nga vendi i ngjarjes
