Armando Broja ka pësuar në muajin dhjetor një dëmtim shumë të rëndë në gju dhe mbylli para kohe sezonin e tij. Një sezon ku ai pritej të afirmohej te Chelsea dhe në radhët e përfaqësueses shqiptare.
Por duket se lojtari po pret me padurim të kthehet në fushë, për të treguar se vazhdon të jetë i njëjti futbollist ambicioz i cili i mahniti të gjithë në vitet e fundit me shpërthimin e tij në skenën e futbollit botëror.
Në një intervistë për “World Soccer”, sulmuesi i kombëtares shqiptare ka folur për periudhën që po kalon, rikuperimin, ambiciet që ka te Chelsea, por edhe me kombëtaren shqiptare, duke u ndalur edhe te Silvinjo dhe ëndrra për të parë kuqezinjtë në një Kupë Bote.
“Është një nder shumë i madh që drejtuesit e rinj më kanë besuar që të jem një pjesë e rëndësishme e planit të së ardhmes së Çelsit, më kanë mbështetur që të përfaqësoj klubin dhe tani është në dorën time që të shlyej këtë besim. Sapo të kthehem nga dëmtimi, ky është objektivi im më i madh afatshkurtër, që të vërtetoj këtë dhe të shfrytëzoj çdo mundësi që do të më shfaqet”, tha fillimisht Broja për të ardhmen e tij te Çelsi, me besimin që do të vazhdonte të ishte pjesë e bluve pasi të kthehej nga dëmtimi.
Ai konfirmoi se riaftësimi po vijonte me ritme të mira dhe u kishte paraprirë afateve që ishin vendosur për rikthimin në fushë në fillimin e edicionit të ardhshëm.
Më pas, Broja u ndal te kombëtarja shqiptare e më saktësisht te trajneri i ri Silvinjo, duke mbështetur idetë që ka braziliani për kuqezinjtë.
