Një tjetër rast i trafikut të emigrantëve të paligjshëm nga vendet e Lindjes me përfshirjen e shtetasve nga Kosova është goditur nga policia.
Pas arrestimit të katër të rinjve disa ditë më parë në Pogradec, të cilët me manovrat për t’i shpëtuar ndjekjes së policisë vunë në rrezik edhe jetën e efektivëve, tre djem dhe një vajzë nga Prishtina janë arrestuar pas mesnate në aksin Maliq-Gramsh.
Mësohet se grupi i të rinje me tre automjete transportonin 5 emigrantë të paligjshëm, të cilëve u kishin premtuar kalimin e kufirit dhe më pas daljen në Evropë përmes Kosovës.
Policia ka sekuestruar 3 automjete luksoze, 4 aparate celulare dhe shuma monetare të valutave të ndryshme.
Njoftimi i policisë:
Specialistët për Hetimin e Trafiqeve të Paligjshme dhe Narkotikëve të DVP Korçë, në bashkëpunim me Komisariatin e Policisë Maliq, organizuan dhe finalizuan operacionin policor të koduar “Midnight 8”. Si rezultat i këtij operacioni u arrestuan në flagrancë shtetasit:
-A. P., 27 vjeç; E. S., 22 vjeçe; U. K., 27 vjeç; A. S., 26 vjeç, banues në Prishtinë, Kosovë.
Shërbimet e Policisë, në bazë të informacioneve të siguruara nga inteligjenca informative, për disa shtetas që do të transportonin kundrejt pagesës, emigrantë të paligjshëm, për të kaluar ilegalisht kufirin, organizuan veprimet dhe në aksin rrugor “Maliq-Gramsh”, pranë vendit të quajtur “Tyrbja e Gocës”, Maliq, bënë të mundur lokalizimin e tre automjeteve, tip “Volksëagen”, “Audi Q7” dhe “Audi A8”, me të cilët po qarkullonin shtetasit e lartpërmendur.
Nga tërësia e veprimeve hetimore dhe provave të siguruara, ka rezultuar se këta 4 shtetas, në bashkëpunim me njëri-tjetrin, do të transportonin kundrejt pagesës, për të kaluar kufirin drejt Kosovës dhe më pas drejt vendeve të BE-së, 5 emigrantë të paligjshëm.
Në cilësinë e provës materiale u sekuestruan 3 automjetet, 4 aparate celulare, shuma monetare të valutave të ndryshme.
Vijojnë hetimet për dokumentimin e plotë të kësaj veprimtarie kriminale, identifikimin dhe kapjen e shtetasve të tjerë të përfshirë në të.
Materialet i kaluan Prokurorisë pranë Gjykatës së Rrethit Gjyqësor Korçë, për veprime të mëtejshme.
