Festa me rastin e Pashkës Ortodokse nuk ka shkuar ashtu siç duhej për një familje në fshatin Mjekës të Elbasanit.
Mësohet se gjatë natës një banesë dykatëshe është përfshirë ngëa flakët, të cilat bënë që të digjej pothuajse plotësisht çatia dhe gjithçka ndodhej në ambientet e katit të dytë.
Nga hetimet dyshohet se zjarri është shkaktuar aksidentalisht nga pakujdesia pasi familjarët kishin lënë ndezur qirinjtë me rastin e Pashkës dhe të kishin shkuar në mesnatë për të ndjekur meshën në Kishë.
Shërbimi zjarrfikës mbërriti menjëherë në vendin e ngjarjes pasi ishte sinjalizuar për ngjarjen nga fqinjët e familjes të cilës shtëpia i ishte përfshirë nga flakët.
Ndërhyrja në kohë mjaft të shpejtë bëri të mundur evitimin e djegies së katit të parë dhe të një banese tjetër që ndodhet fare afër saj.
Policia ka dokumentuar ngjarjen dhe po kryen hetime për zbardhjen e shkaqeve të zjarrit që shkrumboi katin e dytë të kësaj banese.
