Policia e Tiranës nëpërmjet operacionit “Locked” i ka dhënë fund mbajtjes peng të një 28-vjeçareje, së cilës i është hequr liria nga bashkëjetuesit i saj Gleard Gusholli, 31-vjeç.
Mësohet se e reja për një javë është mbajtur me forcë në ambientet e njkë banese në rrugën “Frosina Plaku”, ku është dhunuar nga bashkëjetuesi me sende të forta.
Ishte ndërhyrja e policisë ajo që parandaloi një tragjedi të mundshme, pasi 28-vjeçarja i është nënshtruar menjëherë një ndërhyrje kirurgjikale delikate dhe fatmirësisht ndodhet jashtë rrezikut për jetën.
Për rastin në fjalë Uniformat Blu kanë vënë në pranga edhe katër shtetas të tjerë, të cilët akuzohen për “moskallëzim krimi”.
Bashkë me 31-vjeçarin janë arrestuar miqtë e tij: Besmir Nurçellari, Arjan Sheta, Bledi Kateshi dhe Erlind Kateshi.
Ata e ndihmuan Gushollin duke fshehur provat në mënyrë që policia të mos binte në gjurmët e tij dhe duke e ndihmuar të arratisej.
Gjithashtu janë sekuestruar mjete për konsumimin e lëndëve narkotike, si kokainë në banesën e 31-vjeçarit.
DINAMIKA
Ngjarja u zbardh vetëm mesnatën e kaluar, kur e reja e masakruar nga bashkëjetuesi Gleard Gusholli u la me shenja dhune dhe në gjendje të rëndë në ambientet e një klinike pranë Komisariatit Nr.2 në kryeqytet.
Mësohet se pasi janë telefonuar për t’u njoftuar mbi rastin, policia ka nisur menjëherë hetimet duke zbuluar se 28-vjeçarja ishte dërguar në klinikë nga dy vajza të tjera.
Sipas dinamikës së zbardhur të ngjarjes, nisur nga plagët e rënda që kishte në trup ajo është transportuar me urgjencë për në Spitalin e Traumës. Aty mjekët kanë konststuar se ishte e goditur dhe e gjakosur në të gjithë trupin, duke urdhëruar që t’i nënshtrohej ndërhyrjeve kirurgjikale.
Pas kësaj, policia ka zbuluar se njëra prej vajzave që e ka dërguar në klinikën private ka qenë motra e agresorit. Ajo është marrë në pyetje dhe ka zbuluar për hetuesit banesën ku vajza është mbajtur dhe dhunuar për ditë me radhë.
Brenda banesës policia ka gjetur edhe një këmbë karrigeje me të cilën dyshohet se Gusholli ka dhunuar barbarisht bashkëjetuesen e tij.
Sakaq, mësohet se njëri prej djemve që ka ndihmuar Gushollin të largohet e të fshihet ka qenë kunati i tij (burri i motrës).
Për disa orë me radhë policia e ka kërkuar 31-vjeçarin dhe e ka lokalizuar më pas pranë zonës së “Zogut të Zi”. Gusholli, pasi është arrestuar ka treguar se ishte shumë xheloz, por nuk ka dhënë detaje të plota e konkrete në lidhje me ngjarjen e rëndë.
Ndërkohë, bëhet me dije se pas ndërhyrjes së mjekëve vajza e ka kaluar rrezikun për jetën.
NJOFTIMI I POLICISE
Specialistët për Hetimin e Krimeve të Komisariatit të Policisë Nr. 2, në vijim të punës për goditjen e paligjshmërive në çdo formë të saj, pas informacioneve të siguruara për një shtetas që po mbante me forcë bashkëjetuesen e tij, në banesë, në rrugën “Frosina Plaku”, menjëherë kanë organizuar punën dhe kanë finalizuar operacionin policor të koduar “Locked”.
Si rezultat i këtij operacioni u bë arrestimi i shtetasve:
– G. G., 31 vjeç, B. N., 36 vjeç, A. Sh., 41 vjeç, B. K., 27 vjeç, E. K., 42 vjeç, të pestë banues në Tiranë.
Shtetasi G. G. i ka hequr lirinë për një javë, bashkëjetueses së tij, të cilën e ka dhunuar vazhdimisht, me sende të forta, në banesë, në rrugën “Frosina Plaku”.
Shtetasit B. N. dhe A. Sh. nuk kanë kallëzuar krimin dhe kanë penguar zbulimin e së vërtetës duke tentuar të fshehin provat, ndërsa shtetasit B. K. dhe E. K., (vëllezër), kanë përkrahur autorin e krimit, duke e larguar atë nga vendi i ngjarjes.
Në cilësinë e provës materiale u sekuestruan mjete që përdoren për konsumimin e lëndëve narkotike, mbetje të lëndës së dyshuar narkotike kokainë, që u gjetën në banesën e 31-vjeçarit, si dhe sende të forta me të cilat dyshohet se ai ka dhunuar 28-vjeçaren.
28-vjeçarja ndodhet në spital, në kujdesin e mjekëve.
Materialet i kaluan Prokurorisë, për veprime të mëtejshme procedurale.
