Kjo e dielë ka nisur me një aksident rrugor në Lezhë. Mësohet se në orët e para të mëngjesit një autoambulancë e qytetit të Laçit është përplasur me një automjet në autostradën Lezhë-Milot, në vendin e quajtur “kryqëzimi i Tales”.
Mjeti tjetër i përfshirë në aksident është tip “Ford”. Si pasojë e përplasjes ka mbetur i plagosur drejtuesi i mjetit “Ford”, i cili është dërguar në spital.
Sipas burimeve në vendngjarje, dyshohet se mjeti tip “Ford” i ka ndërprerë rrugën ambulancës duke shkaktuar aksidentin e rëndë. Të dy mjetet kanë pësuar dëmtime të shumta.
Ky është një nga kryqëzimet më vdekjeprurës në rrugët që përshkojnë Lezhën, pasi vetëm në këtë segment rrugor ka pasur dhjetëra raste aksidentesh me viktima.
Policia në vendin e ngjarjes ka nisur hetimet dhe ka kryer veprimet paraprake për zbardhjen e shkaqeve dhe rrethanave të këtij aksidenti.
