Kapriçot e motit nuk kanë fund! Megjithëse jemi në Pranverë, vendi ynë është përfshirë sërish nga reshjet e dëborës dhe temperaturat e ulëta kanë “pushtuar” të gjithë territorin.
Autoriteti Rrugor Shqiptar ka publikuar pamje të reshjeve masive të dëborës që kanë filluar prej mëngjesit të sotëm në aksin Qafë Thore-Theth. Bëhet me dije se borëpastruese po punojnë për të bërë të kalueshëm aksin për automjetet e tjera.
“Në Qafë Thore-Theth kanë filluar reshjet e dëborës. Po punohet me borëpastruese dhe me shpërndarjen e kripës për ta mbajtur qarkullimin në normalitet. Tregoni kujdes të shtuar gjatë drejtimit të mjetit, në kohë me reshje pajisuni me goma dimërore kur udhëtoni për në zonat malore, ulni shpejtësinë, respektoni sinjalistikën dhe udhëzimet e Policisë Rrugore”, njofton Autoriteti Rrugor Shqiptar.
Kujtojmë që polici ka njoftuar mëngjesin e sotëm që për shkak të reshjeve të dendura të dëborës, është bllokuar aksin kombëtar në Rrugën e Arbrit, kryesisht në bypassin Qafë Murrizë.
