Vendimi i Enkelejd Alibeajt për të hyrë me kandidatë të PD-së së vulës në zgjedhjet lokale të 14 Majit, në disa bashki të caktuara nuk u mbështet nga shumica e grupit të deputetëve që ishin rreshtuar pranë tij.
Jorida Tabaku, Dhurata Çupi apo Dashnor Sula kërkuan me ngulm deri në fund që PD e vulës të hynte në zgjedhje vetëm me emra për këshillat bashkiakë dhe fushata të përqëndrohej në mbështetjen e kandidatëve të dala nga “Primaret” në 61 bashkitë e vendit.
Atmosfera që nga koha e marrjes së vendimit nga Alibeaj është e nderë në grupimin e tij, ndërsa disa prej deputetëve që dikur e mbështesnin kanë dalë hapur në fushatë për të mbështetur kandidatët e koalicionit opozitar “Bashkë Fitojmë”.
Teksa në Peqin Dashnor Sula ka dalë në fushatë përkrah kandidatit Mustafa Pasha dhe Ramadan Lika iu bashkua Berishës në takimin prezantues të Isa Ramaj për bashkinë e Koplikut, edhe Saimir Korreshi ka dalë në mbështetje të Belind Këlliçit.
Deputeti i grupit “Alibeaj” u pa përkrah Këlliçit në një takim që kandidati për bashkinë e Tiranës zhvilloi me pjesëtarë të komunitetit lushnjar që jetojnë në kryeqytet.
Takimi u organizua me iniciativë të deputetit Korreshi dhe ish-deputetit Myslim Murrizi, të cilët i bënë thirrje miqve të tyre, që në 14 maj të mbështesin Belind Këlliçin për bashkinë e kryeqytetit.
Vetë Këlliçi postoi disa foto nga takimi, duke i shoqëruar me mesazhin: “Komuniteti lushnjar i ka shtuar Tiranës vlera dhe ka kontribuar gjithnjë në zhvillimin e qytetit. Kënaqësi të flisja, t’i dëgjoja nga afër e t’u paraqisja programin tim, në shoqërinë e Saimirit, Myslymit e Eltonit”.
