Prokuroria e Posaçme në bashkëpunim me Antiterrorin kanë vënë në pranga një person, që bënte thirrje në rrjetet sociale për kryerjen e veprave me qëllime terroriste.
SPAK njofton se “në kuadër të procedimit penal nr.196/2021, pas një hetimi të kryer në bashkëpunim me oficerët e policisë gjyqësore të Drejtorisë se Antiterrorit, i është është drejtuar GJKKO me kërkesë për caktimin e masës së sigurimit personal “arrest në burg” parashikuar nga neni 238 i Kodit të Procedurës Penale, për shtetasin nën hetim Gentian Çollaku pasi ekzistojnë dyshime të arsyeshme të bazuara në prova se ka kryer veprën penale “Nxitja, thirrja publike dhe propaganda për kryerjen e veprave me qëllime terroriste”, parashikuar nga neni 232/a i Kodit Penal”.
GJKKO me vendimin nr. 31 datë 11.04.2023 ka vendosur ndaj këtij të hetuari masën e sigurimit personal “arrest në burg” dhe ky vendim është ekzekutuar ditën e sotme.
Çollaku nga Kavaja, bënte thirrje terroriste kryesisht në rrjetin social Facebook, ku shprehej: “Shejk Ebu Bekr el-Baghdadi: Nëse nuk ndaleni së luftuari ndaj neve, atëherë dijeni se ne kemi ushtarë të cilët nuk flejnë.”
