Një grup deputetësh demokratë ditën e sotme kanë vizituar familjen e Benard Ndrecë, kreun e PD-së në Vaun e Dejës i cili ditën e djeshme ra pre e një atentati me eksploziv ndaj makinës së tij.
Deputeti Flamur Noka e cilësoi ngjarjen si terrorizëm politik të pushtetit, tentativë mafioze për të likuiduar kryetarin e degës së PD dhe e konsideroi kryeministrin Edi Rama si përgjegjës.
Noka tha se kishin ardhur të shprehin keqardhjen “për aktin terrorist që u realizua kundrejt djalit të kësaj familje.
“Është terrorizëm politik i pushtetit ndaj opozitës. Benard Ndreca është kryetari i opozitës, kryetari i PD për Vaun e Dejës; familja njihet si një nga familjet më të shkëlqyera që nuk ka pasur kurrë asnjë problematikë. E gjitha është politike. Tentativa për të likuiduar kryetarin e PD na kujton skenat e mafies në Siçili. Ky është shteti i Edi Ramës. Kemi pritur 24 orë që Edi Rama të reagonte, qeveria të reagonte. Ju e ndoqët që pas aktit terrorist politik, Edi Rama nuk belbëzoi asnjë fjalë. Kjo tregon se ai është përgjegjësi”, tha Noka.
