Një ngjarje e rëndë ka ndodhur në prag të fushatës elektorale për zgjedhjet lokale të 14 majit.
Në orët e para të mëngjesit është hedhur në erë me tritol makina e kryetarit të Partisë Ddemokratike në Vaun e Dejës, Benard Ndreca.
Ky i fundit është zgjedhur kryetar i PD-së për Vaun e Dejës, pas zgjedhjeve të Rithemelimit, dhe ka qenë në krah të kandidatit Zef Hila për zgjedhjet e ardhshme të 14 Majit.
Si pasojë e shpërthimit fatmirësisht nuk ka të lënduar por vetëm dëme materiale. Burime bëjnë me dije se mjeti ka qenë i parkuar në oborrin e shtëpisë së Ndrecës në momentin kur ka shpërthyer.
Nga veprimet e para hetimore të policisë rezulton se shpërthimi ka ndodhur në momentin që shtetasi Benard Ndreca ka hipur në automjet.
Vau i Dejës është një nga bashkitë e pakta ky opozita kandidon me dy emra. Nga Rithemelimi kandidon Zef Hila, i cili ka mbajtur dhe mandatin e deputetit, si dhe ka qenë më herët në krye të Bashkisë.
Dhe nga ana tjetër kandidon Klomentina Drini, e cila nuk ka marrë as mbështetjen e kandidatëve për këshilltarë bashkiakë, të propozuar në listë nga Grupi Alibeaj.
- Çfarë njofton policia për shpërthimin me tritol?
“Vau i Dejës/Informacion paraprak
Rreth orës 07:10, në fshatin Paçram, Vau i Dejës, në pjesën e përparme të automjetit tip “Audi”, në pronësi të shtetasit B. N., dyshohet se ka shpërthyer lëndë plasëse.
Me marrjen e njoftimit, menjëherë në vendngjarje kanë shkuar shërbimet e Policisë dhe grupi hetimor.
Nga veprimet e para rezulton se shpërthimi ka ndodhur në momentin që shtetasi B. N. ka hipur në automjet.
Nga shpërthimi, shtetasi B. N. nuk ka pësuar dëmtime, por janë shkaktuar vetëm dëme të pjesshme materiale.
Grupi hetimor, në drejtimin e Prokurorisë, vijon veprimet intensive në vendngjarje, me qëllim zbardhjen e rrethanave të ngjarjes, identifikimin dhe kapjen e autorit/ve”, njofton policia.
- Shpërthimi ndodhi vetëm një ditë pasi Grupi Alibeaj “tradhtohet” nga demokratët në Vaun e Dejës
Kujtojmë që ditën e djeshme lista e kandidatëve për Këshillin Bashkiak të “Grupit Alibeaj” në Vaun e Dejës del në mbështetje të kandidatit të Berishës në zgjedhjet lokale të 14 majit.
Lajmin e ka bërë të ditur vetë PD dega e Vaut të Dejës, e cila me anë të një komunikate zyrtare për shtyp njofton se nga sot, ata shprehin hapur mbështetjen për kandidatin e koalicionit “Bashkë Fitojmë”, Zef Hila.
Në komunikatë mes të tjerash, shkruhet se ata distancohen nga çdo kandidaturë personale e kujtdo qoftë ajo, përfshirë edhe Alibeajt, për sa kohë kjo kandidaturë është nxjerrë në kundërshtim me vullnetin e demokratëve të bashkisë së Vau Dejës.
“DEKLARATË E KANDIDATËVE TË PARTISË DEMOKRATIKE PËR KËSHILLIN BASHKIAK TË BASHKISË VAU DEJËS
Ne, kandidatët për këshilltarë të Këshillit Bashkiak të Bashkisë Vau Dejës, duke falenderuar Kryesinë e Degës dhe strukturat e PD, Dega Vau Dejës, për besimin dhe mbështetjen, shprehim qëndrimin tonë lidhur me fushatën elektorale për zgjedhjet lokale të 14 Majit 2023:
Ne sot, me anë të kësaj deklarate, shprehim hapur mbështetjen tonë për kandidatin e koalicionit “Bashkë Fitojmë” z. Zef Hila.
Ne distancohemi nga çdo kandidaturë personale e kujtdo qoftë ajo, përfshirë edhe të kryetarit të komanduar të PDSH-së, për sa kohë kjo kandidaturë është nxjerrë në kundërshtim me vullnetin e demokratëve të bashkisë së Vau Dejësit.
Ne i bëjmë thirrje të gjithë demokratëve të bashkisë së Vau Dejësit, që të bashkuar të mbështesim kandidatin e përbashkët të demokratëve, z. Zef Hila dhe listën e kandidatëve për Këshillin Bashkiak të Partisë Demokratike të Shqipërisë.
Z. Zef Hila është ish-kryebashkiaku jonë, është Deputeti ynë, është njeriu më i votuar dhe më i mbështetur i kësaj zone, dhe po ashtu edhe në listen tonë për këshilltarë bashkiak janë përfshirë gra dhe burra të ndershëm, profesionistë e me integritet, me kontribute për komunitetin tonë, e të gjithë janë të gatshëm për të punuar me përkushtim dhe me besim, për fitoren e padiskutueshme të Partisë Demokratike në Këshillin Bashkiak dhe të z. Zef Hiles si kryetar i ardhshem i Bashkisë Vau Dejës me 14 Maj.”, njoftoi dje PD-ja ne Vaun e Dejes.
