Nga Boldnews.al
Çdo rrugë e Tiranës sot është e shkatërruar nga “ndërtimi” kaotik i tyre. Atë që nuk e bëri në katër vite, kryebashkiaku i Tiranës po e bën sikur po e bën për vetëm një muaj, që përkon fiks dhe me fushatën elektorale. Nuk ka më asnjë dyshim që Erion Veliaj ka nisur të ndjejë “takikardi politike”, kur sheh sondazhet se popullariteti për të është gjithnjë e në rënie.
I ardhur nga propaganda dhe i majmur tetë vite si kryebashkiak vetëm me propagandë, Veliaj sot po tenton që qytetarët të mos e ngrenë më kokën lart, por të shohin poshtë, aty ku zifti elektoral të ngjitet si Veliaj pas kameras… Erë e rëndë që të zë edhe atë pak ajër të ndotur që na ofron kryeqyteti. Kudo në Tiranë është kjo pamje e trishtë që duket sikur lufton me vetën. Rilindasit thonë se kjo është forma e duhur, duke shtruar rrugica, ndonjë trotuar të shtrembër apo vendosur provizorisht ndonjë kapak pusete.
Kjo është forma që ka zgjedhur, sepse as propaganda nuk pi më ujë, për të treguar se çfarë ka bërë, pasi ajo që është bërë fatkeqësisht nuk zhbëhet më, por trashet çdo ditë zullumi që për qëllim final duket se ka që kryeqyteti të bëhet edhe më i pajtueshëm ngase është.
Vetëm era zift dhe asfaltit të sapohedhur ndihet dhe duket. Që është vetëm për fushatë kuptohet pa qenë as inxhinier rrugësh, e as usta i bërë në praktikë. Në çdo rrugicë të Tiranës hidhet asfalt pa kryer punimet e nevojshme nëntokësore, si kanalizimet; zhvendosja e tubacioneve të ujit; ndërtimi i kolektorëve të vegjël; rregullimin e linjave elektrike dhe telefonike dhe mbi të gjitha vendosja e trasesë së nevojshme nën asfalt. Kjo shtresë e zezë si malinjiteti propagandës mbulon pisllëkun e këtyre tetë viteve në krye të bashkisë.
E tillë është gjendja poshtë në tokë, ndërsa më lart, batërdia është shumë më e rëndë. Pasi ke mbushur mushkëritë me dioksidin e karbonit që rrjedh nga trafiku i rënduar dhe makineritë e rënda çdokush kërkon shpëtim për të parë më në hapësirë. Por sytë ka kohë që ia ka zënë çdo qytetari kjo Tiranë katrahure.
Pallate dhe kulla pafund, duke bllokuar çdo hapësirë publike dhe zhdukur sheshin qendror të kryeqytetit me mbirjen e kullave oligarkike që nën sytë e kryebashkiakut kanë shtuar edhe shumë kate pa leje. Tirana është një vend ku derdhet beton i madh që vjen si filtër qeveritar për paranë e pisët të trafiqeve të paligjshme.
Është vendi ku krimi, politika dhe biznesi oligarkik mbesin trekëndëshi që sfidon edhe Bermundën. Kryeqyteti sot këtë të ofron, ndërsa Veliaj ka kohë që ka ndryshuar pseudonimin. Nuk mund të quhet më vetëm “nikoqiri” Lali Eri, por shkon drejt një emërtimi tjetër. Më i sakti në këtë marrinë fushate mbetet Beton Zifti!
