Sfida e vlefshme për javën e 28-të të Kategorisë Superiore mes Kastriotit dhe Bylisit, që u shty pas kërcënimeve me jetë ndaj arbirtrit kryesor Juxhin Xhaja dhe familjes së tij, do të zhvillohet më 19 prill.
Edhe pse pas kallëzimit të FSHF-së dhe Xhajës ende nuk është arrestuar asnjë person për mesazhet dhe telefonat me përmbajtje kërcënuese, Federata ka vendosur të shtyjë me vetëm 10 ditë sfidën.
Gjithashtu është zgjedhur stadiumi “Elbasan Arena” si impianti që do të mirëpresë krutanët dhe mallakastriotët, dy ekipe që luftojnë për të mbetur në Superirore.
Gjithashtu, Federata Shqiptare e Futbollit ka vendosur që të gjithë ndeshjet e Kastriotit si pritës deri në fund të sezonit, të luhen në stadiumin “Elbasan Arena”, duke lënë të nënkuptuar se kërcënimet mund të kenë ardhur nga Kruja.
Vendimi është marrë pasi Policia e Shtetit nuk pranon të marrë përsipër garantimin e sigurisë në stadiumin e Kamzës, që ka qenë edhe shtëpia e krutanëve deri para pak ditësh.
Deklarata e FSHF-së:
Federata Shqiptare e Futbollit dëshiron të informojë komunitetin e futbollit dhe opinionin publik se ndeshja Kastrioti-Bylis, e vlefshme për javën e 28-të të Abissnet Superiore, e planifikuar për tu zhvilluar më datë 9 prill 2023, do të zhvillohet të mërkurën e datës 19 prill në stadiumin “Elbasan Arena” duke filluar nga ora 15:00.
FSHF është në kontakt të vazhdueshëm me autoritetet ligjzbatuese për zbardhjen e ngjarjes së rëndë të ndodhur me zyrtarët e ndeshjes. Hetimet janë duke vazhduar dhe në të njëjtën kohë presim që gjithçka të sqarohet sa më parë në mënyrë që gara të vazhdojë normalisht deri në fund.
Klubi Kastrioti do t’i luajë të gjitha ndeshjet e mbetura deri në fund të sezonit në stadiumin “Elbasan Arena” për shkak se Policia e Shtetit nuk merr përsipër garantimin e sigurisë në stadiumin “Kamza”.
