Autobusët urbanë kthehen edhe njëherë protagonistë të ngjarjeve problematike në kryeqytet. Këtë të Hënë, një i tillë është përfshirë nga flakët.
Policia njoftoi se rreth orës 16:50, në rrugën “Dritan Hoxha”, ka marrë flakë në lëvizje e sipër dhe është djegur pjesërisht në pjesën e motorit autobusi i linjës së Institutit.
Në vendin e ngjarjes kanë shkuar shërbimet e Policisë dhe shërbimet zjarrfikëse. Personat që ndodheshin në mjet kanë dalë dhe nuk ka asnjë të dëmtuar, shtojnë të njëjtat burime.
Paraprakisht dyshohet se zjarri është shkaktuar aksidentalisht, ndërsa grupi hetimor po punon për zbardhjen e rrethanave të ngjarjes, mbyllet njoftimi i bluve.
Përveç shërbimit që lë shumë për të dëshiruar, autobusët urbanë janë kthyer shpesh kohët e fundit në problematikë e të rrezikshëm për sa i përket sigurisë në qarkullim.
Më 27 Shkurt, një autobus i linjës së Unazës përplasi disa automjete te zona e njohur si “Shallvaret”, duke shkaktuar disa të plagosur.
Aksidenti erdhi pas atij të ndodhur në Prill 2022, kur një urban po i linjës së unazës përfundoi në Lanë, duke shkaktuar edhe atëherë një duzinë me të plagosur.
Aksidente të tjera me bilanc të plagosurish më të ulët kanë ndodhur po ashtu javët e fundit.
