Mbrëmja e Pashkëve në Asti të Italisë është përgjakur nga një aksident tragjik, që i ka marrë jetën katër të rinjve.
Aksidenti ka ndodhur pak pas orës 22:00 në rrugën provinciale 456, ku dy makina u përplasën “kokë më kokë” në rrugën Turchino që lidh Liguria me Monferrato.
Viktimat janë një 23-vjeçar nga Asti dhe tre shtetas 30-vjeçarë të Maqedonisë së Veriut, me banim në zonën e Astit.
23-vjeçari udhëtonte i vetëm me njërën prej veturave të përfshirë në aksident, ndërsa tre maqedonasit në tjetrën.
Të dyja makinat u skatërruan plotësisht, me njërën prej tyre që përfundoi mbi barrierat mbrojtëse.
Në vendngjarje kanë ndërhyrë dy ekipe zjarrfikëse, ambulanca dhe policia rrugore e Astit, por fatkeqësisht asnjë prej të rinjve nuk mundi të shpëtojë.
