Sipas strukturës së vitit shkollor 2022-2023 pushimet fillojnë më 3 prill dhe mbarojnë në datë 9, por duket se ligji po shkelet me të dyja këmbët nga Drejtori i Zyrës Arsimore të Elbasanit, Ermir Çela, i cili ka detyruar mësuesit të paraqiten në shkolla edhe gjatë javës së përcaktuar si pushim për ta dhe nxënësit.
Këtë denoncim e ka bërë deputetja demokrate Albana Vokshi, e cila nëpërmjet një postimi në Facebook nënvizon se “mësuesit e Elbasanit po trajtohen si të ishin skllevër”.
“Detyrohen të shkojnë në punë edhe kur ligjërisht ju takon pushim”, shkruan Vokshi, teksa postimin e shoqëron me një foto të urdhrit të Përbashkët Nr. 227 dt 28.4.2022 të Ministres së Arsimit dhe Ministres së Financave dhe Ekonomisë, që përcakton që datat 3 deri në 9 prill janë ditë pushimi për mësuesit.
“Drejtori Ermir Cela dhe drejtore të tjerë të shkollave në Elbasan, kanë urdhëruar mësuesit të dalin çdo ditë të javës në punë, madje ushtrojnë edhe kontrolle gjatë ditës e marrin mungesa. Java e parë e prillit është e drejtë ligjore, asnjë drejtor asnjë ministër s’mund të urdhërojë ndryshe. #ministret @eviskushi dhe @delinaibrahimaj janë përgjegjëse për këtë shkelje të të drejtave të mësueseve, për keq shfrytëzimin në punë të tyre”, shprehet Vokshi.
Duke iu drejtuar ministres Kushi, e cila është edhe deputete e qarkut të Elbasanit, Vokshi thekson se është vënë në dijeni për këtë shkelje flagrante të të drejtave të mësuesve, ndërsa hedh dyshime se mund të jetë edhe urdhëruese e shkeljes ligjore.
“Është e rëndë që një ministre arsimi lejon haptasi, madje në zonën e saj elektorale, këtë keq shfrytëzim të mësuesve dhe shkelje te te drejtave! Mësuesit nuk janë skllevër!! Ata duhen trajtuar me respektin dhe dinjitetin që ju takon. Kërkoj që të merren masa të menjëhershme që për çdo mësues të respektohet Urdhri i Përbashkët Nr. 227 dt 28.4.2022, të marrin ditët e mbetura të javës pushim, siç ju përket. Ditët e javës që kanë punuar t’u zëvendësohen me ditë të tjera, ose t’u paguhet shtesë sipas legjislacionit në fuqi. Mësuesit, nuk meritojnë këtë keqtrajtim! Ata nuk meritojnë këtë qeveri! Ata nuk meritojnë këtë Ministre Arsimi!”, shkruan Vokshi.
