Detaje të reja kanë dalë në dritë për sherrin me armë të ftohta që ndodhi paraditen e sotme në lagjen Nr.3, para katedrales “Shën Luçia” në qytetin e Durrësit, ku mbetën të plagosur dy të rinj.
Mësohet se protagonistë të ngjarjes kanë qenë dy djemtë e identifikuar si Xheson Metushi (18 vjeç), nga qyteti i Lushnjës dhe 19-vjeçari nga Durrësi, Bekim Gripshi.
“Konflikt me thika në Durrës. Ngjarja ka ndodhur paraditen e sotme rreth orës 10:30, në lagjen nr. 3, Durrës, dyshohet se gjatë një konflikti për motive të dobëta, shtetasit B. G., dhe Xh. M., kanë dëmtuar njëri-tjetrin, me mjete prerëse”, njoftoi policia.
Shkak për përplasjen midis të rinjve është debat që ata kanë pasur në rrjetet sociale disa ditë më parë, ku kanë shkëmbyer mesazhe fyese dhe kanë lënë datën e sotme për t’u takuar dhe sqaruar mes tyre.
Debati ka nisur në rrjetin social “Tik-Tok” për një postim të bërë nga një prej tyre dhe fatkeqësisht përfundoi sot me përdorimin e kaçavidës dhe thikës nga dy djemtë që plagosën njëri-tjetrin.
Të pranishëm në momentin e sherrit kanë qenë dy grupe djemsh. Sipas dëshmitarëve, në vendngjarje kanë qenë 6 adoleshentë dhe pas një konflikti verbal, sherri ka degjeneruar deri në përplasjen fizike mes Metushit dhe Grifshit.
Pas plagosjes, njëri nga të rinjtë e ka hedhur kaçavidën në kazanin e plehrave, ku është gjetur nga specialistët e kriminalistikës. Ndërkohë thika që është përdorur nga një tjetër adoleshent nuk është gjetur ende.
Nga burime policore mësohet se dy të plagosurit janë jashtë rrezikut për jetën në spitalin e Durrësit. Ndërkohë, në vendngjarje mbetën njollat e gjakut dhe sende personale të adoleshentëve të përfshirë në konflikt.
