Bayern Munchen kaloi edhe një tjetër sezon pa e fituar Kupën e Gjermanisë, aty ku Freiburgu i shkaktoi humbjen, njëkohësisht eliminimin nga kompeticioni.
Duket se triumfi në “Klasike” i dehu të besuarit e Thomas Tuchel.
Thomas Muller, edhe pse me shiritin e kapitenit në krahë, nuk guxoi të merrte përsipër peshën e eliminimit, por e justifikoi nëpërmjet elementit “fat”, pasi sipas tij bavarezët nuk luajtën edhe aq keq.
“Gjendemi vërtet në situatë të hidhur pas asaj të shtune plot ngjyra dhe emocione. Nuk është e lehtë të analizosh lojën pas këtij skenari jo të këndshëm. S’mendoj se zhvilluam paraqitje aq të keqe sa të kishim të tillë përfundim.
Më vret se u skualifikuam në fushën tonë përballë tifozërisë. Freiburgu u përqendrua në mbrojtje dhe na e bëri të vështirë depërtimin në zonën e rreptësisë. Ata shfrytëzuan çastet finale nga mbyllja e sfidës dhe goditën për të kaluar në gjysmëfinale.
Pas minutës së 65-të tempi i lojës ra nga ana jonë dhe duket sikur na munguan shkëndijat e duhura për të rritur dozat e sulmit dhe për të shpresuar në gjetjen e golit, i cili mund të rezultonte deçiziv.
Miqtë u treguan dinakë në ato dalje të cunguara, megjithëse përfundimi i lojës dha verdiktin se kush kaloi më tej. Jo gjithmonë fiton më i miri dhe ky është pikërisht nga ato raste kur ky term përshtatet”, përfundoi kapiteni Muller.
