Prej ditës së djeshme në rrjet po qarkullon foto e një projekti që pritet të jetë “Niko Dovana” i ri në Durrës.
Foto që tregon një impiant sportiv me kapacitet 12 mijë ulëse duket se është projekti i një investitori që do ti propozohet qeverisë dhe që parashikon prishjen e anekseve sportive rreth stadiumit aktual.
Sipas “Albania Team”, faqe e specializuar në Facebook që publikon materiale mbi kombëtaren shqiptare dhe ekipet e Superligës, investitori privat (emri i të cilit ende nuk është bërë publik) sugjeron ndërtimin e një stadiumi dhe në këmbim do të përfitojë truallin rreth “Niko Dovanës” për të ndërtuar dy kulla, njëra 125 metra dhe tjetra 155 metra e lartë.
“Në truallin ku do të ndërtohen dy kullat, ndodhen aktualisht dy fusha stërvitore, dy kalceto dhe dy fusha basketbolli, që sigurisht do të prishen për t’i lënë vendin dy kullave”, shkruan “Albania Team” në postimin në Facebook.
Kullat që I bashkëngjiten stadiumit i ngjajnë asaj në stadiumin “Air Albania”, e cila ka lartësi 112 metra (24 kate).
Aktualisht në fushat stërvitore rreth e qark stadiumit “Niko Dovana” stërviten shumë ekipe moshash, nga fëmijët më të mitur e deri tek ekipet e të rinjve dhe nëse projekti miratohet për t’u zbatuar, me qindra nxënës në Durrës rrezikojnë të mbeten pa terrenet sportive, ku stërviten çdo ditë dhe ushtrojnë aktivitet fizik.
Ndërtimin e një stadiumi të tillë me dy kulla shoqëruese, e ka denoncuar sot edhe sekretarja e Marrëdhënieve me Publikun në PD, Jola Hysaj.
Në një deklaratë për mediat ajo akuzoi kryeministrin Edi Rama se i ka premtuar privatit dy kulla në këmbim të një impianti sportiv modern në Durrës.
“Skema e Tiranës, kullë me stadium, po përsëritet edhe në Durrës. Jo një, por dy kulla i janë premtuar një investitori privat, ende anonim, që do të ndërtojë stadiumin e ri në Durrës.
Skema do të përsëritet, ashtu si në Tiranë, edhe sa i takon transparencës. Asnjë qytetar nuk ka parë gjë, nuk është pyetur dhe, të gjithë durrsakët, ashtu si tiranasit, do të gjenden para faktit të kryer. Sepse atë që do Partia nuk duhet të diskutohet nga populli”, denoncoi PD.
Ndërkohë, sipas Hysajt duke pasur parasysh se lagjja Nr.18 ku ndodhet stadiumi ishte ndër më të dëmtuarat nga tërmeti i 26 nëntorit 2019, projektet për ndërtime shumëkatëshe aty mund të rezultojnë të rrezikshme.
“Ndryshimi i vetëm mes kullave të Durrësit dhe asaj të Tiranës është lartësia. Kryeqyteti e ka 112 m ndërsa qyteti bregdetar do të guxojë më shumë në marrëzi, me 125 dhe 155 metra. Ndërtimi i kullave shumë katëshe në lagjen nr.18 ngjan një vendim absurd, duke pasur parasysh se zona ishte ndër më të dëmtuarat nga lëkundjet sizmike të tërmetit të 26 nëntorit 2019”, theksoi Hysaj.
