Nga Boldnews.al
“Është sharlatan, manipulues dhe pastrues parash. Nuk do të marrë asnjë kacidhe nga Shteti Shqiptar”. Furia e sulmeve dhe përbetimet e kryeministrit Edi Rama kundër biznesmenit Italian, Francesko Beketi, përfunduan me një faturë të hidhur për Buxhetin e varfër të Shqipërisë.
Gjykata e Arbitrazhit e Bankës Botërore vulosi përfundimisht gjobën 110 milionë euro, që vendi ynë duhet t’i paguajë ish-pronarit të “Agon Channel”, për shkak se Edi Rama zhvilloi një betejë personale me sipërmarrësin përtej Adriatikut.
Në 29 Mars 2023, Arbitrazhi Ndërkombëtar vendosi të mos pranojë ankimin e qeverisë shqiptare për anulimin e gjobës që ishte vendosur rreth tre vjet më parë.
Fatura që do të paguajnë shqiptarët për trillet e Ramës, por jo vetëm të tijat, është akoma më e lartë. Shteti shqiptar ka paguar mbi 3 milionë euro për studiot ligjore që e kanë përfaqësuar në procesin gjyqësor, ndërkohë që një faturë ende e paqartë në qindra mijëra euro do të shkojë për shpenzime administrative.
E gjithë kjo betejë nisi vetëm për faktin se Edi Rama nuk ishte dakord me linjën editoriale të “Agon Channel”.
Dehja nga “1 milion vota”
Në vitin 2013, kur Rama mori mandatin e parë, televizioni i Beketit, i cili në Shqipëri kishte edhe biznese të tjera, u pozicionua në linjë kritike me qeverinë.
I dehur nga pushteti i “1 milion votave”, Rama nuk mund ta konceptonte se si një television në Shqipëri mund të qëndronte përballë tij.
Ai angazhoi të gjithë strukturat ligjzbatuese dhe hetimore për t’i hyrë me themeli aktivitetit tregtar të Beketit në Shqipëri.
Ky i fundit nuk ishte ëngjëll dhe kishte kusure të shumta në vendin tonë, sidomos me koncesionin e papërfunduar të hidrocentralit të Kalivaçit, për të cilin kishte fituar kontratën që në vitin 1997.
E, megjithatë, beteja e Ramës me Beketin dukej se nuk lidhej aspak me bizneset e Beketit, por me frymën kritike të televizionit. Kjo u konstatua edhe në vendimin e Gjykatës së Arbitrazhit, e cila e konsideroi përplasjen Rama-Beketi, të lidhur vetëm me aktivitetin e televizionit.
Në këtë histori, si në shumë të tjera ku luftohet për pushtet dhe ndikim mediatik, përfshihen edhe dy personazhe të tjerë që qëndrojnë në dy anët e gjatoshit Edi Rama. Ata janë Erion Veliaj dhe Ëngjëll Agaçi.
“Boldnews.al” ka raportuar më herët se konflikti Rama-Beketi, natyrisht, nuk ishte ai ndërmjet “të mirit” dhe “të keqit”. As ndërmjet dikujt që “do të bënte shtet” dhe dikujt tjetër që “luftonte për lirinë e medias”. Përplasja ndërmjet tyre i ngjan më shumë një lufte për fitim territoresh.
Njerëz pranë Beketit, bashkëpunëtorë të tij të ngushtë, e paraqesin situatën si një inkursion i Edi Ramës kundër “Agon Channel”, për shkak të linjës së tij editoriale kundër qeverisë së majtë.
Nga ana tjetër, qeveria e ka prezantuar Beketin si një “pastrues parash”, ndaj të cilit ka fituar në përballje të mëparshme në Arbitrazh.
Shumica e shqiptarëve (të paktën zyrtarisht) kanë votuar Edi Ramën për t’i qeverisur dhe për të menaxhuar si duhet financat publike e t’i mbrojë ato nga manipulatorët e tregut, siç e konsideron qeveria Beketin.
Por, në konfliktin me Beketin, Rama duket se ka pasur prioritet mbrojtjen e imazhit të tij, duke dështuar në mënyrë katastrofike.
“Pyka” Veliaj
Lufta personale e Ramës me sipërmarrësin Italian, fillimisht u zhvillua nën rrogoz, në tavolina e tryeza të ndryshme, nëpërmjet telefonatave e mesazheve.
Ajo u shpërfaq për publikun, kur në lojë hyn si pykë Erion Veliaj. Edhe, ky, njëlloj si lideri i tij, i dehur nga pushteti i fituar nga Rama në vitin 2013, vendos të zhvillojë një ceremoni dasme luksoze.
Veliaj, i cili mbante në atë kohë postin e Ministrit të Mirëqenies Sociale, vendos të gëzohet në Kalanë e Gjirokastrës, me një event “të paguar nga kursimet e nënës”.
Kamerat e “Agon Channel” fiksuan pamje të ceremonisë gala, gjë që acaroi Veliajn, pasi i zbuloi vanitetin e tij.
I shqetësuar nga kamerat e televizionit, Veliaj i dërgon mesazhe kërcënuese në adresë të Beketit: “Shoh grupin e xhirimit të Agon-it në Gjirokastër. S’e kuptoj pse po ma bëni këtë. Po më bëni armik me zor. Do të bëj qeverinë armik pa shkak. Është ceremoni private, dreqi e mori”.
Për “liderin”, Beketi po e mbushte kupën. Ai urdhëroi çdo lloj strukture të hetimit administrativ e penal që të merreshin me llogaritë e biznesmenit Italian.
Ndërkohë, një tjetër personazh shumë pranë Ramës, Sekretari i Përgjithshëm i Kryeministrisë, Ëngjëll Agaçi, merr rol “mediator” në konflikt.
“Eminenca gri” e kryeministrit takohet me Beketin dhe i deklaron se “nuk bën mirë që i bën opozitë qeverisë”. Mesazhi ishte i qartë-tërhiqu nga fryma kritike dhe nuk do të kesh probleme me bizneset e tjera.
Agaçi, sipas të dhënave të nxjerra gjatë Arbitrazhit Ndërkombëtar, i kërkon Beketit gjithashtu që të komunikojë dhe të dëgjojë Enkel Jotin, i cili në atë kohë ishte drejtor i përgjithshëm i televizionit “Top Channel”.
Francesko Beketi duket se e ka kuptuar që beteja me Ramën do të ishte e humbur dhe vijoi linjën e tij kritike në “Agon Channel”, qasje të cilën mund ta shfrytëzonte më së miri në një Arbitrazh të mundshëm me Shtetin Shqiptar.
Hakmarrja e Ramës nuk vonoi. Në qershor të vitit 2015, Beketi i shpëtoi arrestimit, pasi ndaj tij, nënës së tij dhe dy bashkëpunëtorëve të ngushtë, Prokuroria e Tiranës lëshoi urdhër-arreste për evasion fiskal, të inicuar nga Policia dhe Hetimi Tatimor.
Beketi, nga Anglia, nisi betejën ligjore ndërkombëtare, një terren që e njihte shumë më mirë se sa zyrtarët e shtetit shqiptar.
Fillimisht, ai siguroi një vendim gjykate ndërkombëtare, nëpërmjet të cilit, Interpoli Ndërkombëtar e hoqi nga kërkimi ndërkombëtar.
Më tej, ai vijoi procedurat në Gjykatën e Arbitrazhit Ndërkombëtar të Bankës Botërore.
Fundi është i njohur. Shteti Shqiptar duhet t’i paguajë Beketit një gjobë tepër të majme, në shumën 110 milionë euro.
Të gjitha këto do të paguhen nga taksat e qytetarëve shqiptarë.
