Faza e tretë në Kategorinë Superiore mbyllet sot me dy ndeshje shumë interesante, ku diskutohet gjithçka në një luftë të ethshme që përfshin titullin kampion, Europën dhe mbijetesën.
Kastrioti-Laçi është ndeshja e parë, e cila luhet në orën 15:00 dhe padyshim që do të dhurojë “shkëndija” pasi për krutanët ky është ndoshta shansi i fundit për mbijetesën.
Me distancën e krijuar para tyre nga skuadrat jashtë zonës së ftohtë dhe faktin që kurbinasit janë rival direkt, çdo gjë tjetër veç një fitoreje do të bënte edhe më pak të mundur rikuperimin nga Kastrioti që mban vendin e fundit në tabelë. Kurse për Laçin, tre pikë sot vlejnë shumë pasi mund ta katapultojnë direkt në luftën për Europën.
Ndeshja e orës 18:00 sheh në fushë kampionët e Tiranës përballë Erzenit, që vazhdon të mahnitë në këtë sezon. Bardhebluve nuk u lejohen hapa fals, si për faktin se Partizani ka fituar një ditë më parë, ashtu edhe se Egnatia ka filluar të bëhet kërcënuese pas krahëve të tyre.
Po ashtu, Erzeni e sheh ndeshjen sot si mundësinë e mirë për të mbajtur gjallë ëndrrën në Europën, por edhe për të thelluar distancën e sigurisë nga skuadrat që luftojnë për mbijetesë.
JAVA 27
E SHTUNË
KUKËSI-EGNATIA 0-3
VLLAZNIA-BYLIS 0-0
TEUTA-PARTIZANI 0-2
E DIEL
KASTRIOTI-LAÇI ORA 15:00
TIRANA-ERZENI ORA 18:00
