Nga Boldnews.al
Kreu i Prokurorisë së Posaçme (SPAK) vuri në dyshim pronësinë e kompanisë “Integrated Energy bv”, e cila ka fituar kontratën koncesionare për ndërtimin e zonës së përpunimit të mbetjeve në Sharrë të Tiranës, me vlerë 128 milionë euro.
I pyetur nga gazetarët të premten e kaluar se përse Prokuroria nuk ka avancuar me hetimet për procedurat e landfillit të kryeqytetit, njësoj si me projektet e Elbasanit dhe të Fierit, Altin Dumani deklaroi se “ka shoqëri pas shoqërie dhe duhet të gjendet pronari real, se të çon në arbitrazh”.
Në Gusht të vitit 2017, qeveria shqiptare, e përfaqësuar nga Ministri i Mjedisit i asaj kohe, Lefter Koka, si edhe kompania, “Integrated Energy bv”, në pronësi të një shoqërie tjetër në e regjistruar në Hollandë, nënshkruan kontratën koncesionare për ndërtimin dhe operimin e landfillit dhe inceneratorit të Tiranës.
Të dhënat e publikuara kohë pas kohe kanë krijuar një konsensus të gjerë publik se pronari real i landfillit të Sharrës është Klodian Zoto dhe enturazhi që e ka shoqëruar atë në aferat e tjera të inceneratorëve në Elbasan dhe Fier.
Por, nëse është kështu, atëherë çfarë janë ata tre emra që shfaqen në letra si pronarët e kompanisë koncesionare.
Drejtuesi i Strukturës së Posaçme Anti-Korrupsion (SPAK), Dumani, duket se është një prej atyre që beson se “pronarët përfitues” në letra të kompanisë “Integrated Energy bv”, në fakt nuk janë të tillë, përsa kohë Prokuroria e Posaçme vijon të kërkojë pronarin real të landfillit të Sharrës.
Pronarët “në letra”
Sipas të dhënave që gjenden në regjistrat publikë shqiptarë, kompania e regjistruar në Shqipëri me emërtimin “Integrated Energy bv” zotërohet në masën 100 përqind nga “Geogenix BV”, me seli në zonën off-shore të Amsterdamit, në Hollandë.
Referuar gjithnjë informacioneve zyrtare, pronarët përfitues të kompanisë koncesionare të Sharrës janë:
- Giuseppe Ciaffaglione, shtetas Italian. Pronar Përfitues, pasi zotëron 30% të aksioneve tek GeoGenix (kompania mëmë e Integrated Energy BV SPV).
- Salvatore Russelli, shtetas Italian. Pronar Përfitues, pasi zotëron 25 % të Geogenix BV, nëpërmjet shoqërisë së tij “Hydros Srl”.
- Alberto Presezzi, shtetas italian. Pronar Përfitues, pasi zotëron 43% të “Geogenix”, nëpërmjet kompanive të tij, “BrunoPrezzi Spa” dhe “Franco Tosi Meccanica Spa”.
Ndërkohë, vetëm 2 përqind e aksioneve të kompanisë “mëmë”, Geogenix bv, mbeten të paemërtuara, pasi deklarohen vetëm pronarët përfitues që zotërojnë të paktën 25 përqind.
Megjithatë, kushdo që të zotërojë këtë 2 përqindësh, si rregull, nuk mund të konsiderohet aspak vendimtar në rolin e shoqërisë.
Atëherë, nëse këto emra janë zyrtarisht pronarë, përse SPAK-u është i paqartë për “pronarin real” të kompanisë koncesionare të Sharrës.
Pikëpyetja e vetme që ngrihet është që, edhe për Prokurorinë e Posaçme, emrat e prezantuar si “pronarë përfitues”, në fakt nuk janë aspak të tillë dhe dikush tjetër fshihet pas tyre.
Roli i Klodian Zotos
Prej shumë kohësh, opinioni publik ka marrë informacione nga burime të ndryshme, të cilat identifikojnë biznesmenin në kërkim, Klodian Zoto, si pronarin e vërtetë të inceneratorit të Sharrës.
Zoto ka qenë pjesë e të gjithë operacioneve që në fillim të procedurave për koncesionin e landfillit të Tiranës.
Në 23 Qershor 2016, tre kompani, përkatësisht “Energy Recuperator S.P.A.”, “Paul Wurth Italia S.P.A.” dhe “Integrated Technology Services”, kjo e fundit në pronësinë e Klodian Zotos, i drejtuan Ministrisë së Mjedisit, së drejtuar në atë kohë nga Lefter Koka, një shkresë me lëndë “Letër interesi për projektpropozimin”, ku ato shpreheshin të interesuara për rehabilitimin e landfillit ekzistues të Sharrës, ndërtimin e landfilleve të reja dhe inceneratorit për prodhimin e energjisë elektrike.
Vetëm 5 ditë më pas, ministri i Mjedisit, Lefter Koka, pasi e shqyrtoi propozimin, vendosi t’i përgjigjet shoqërive propozuese se: “Në vlerësimin e këtij propozimi Ministria e Mjedisit, shprehet se propozimi i pakërkuar konsiderohet i pranueshëm dhe paraqet interes publik. Ministria e Mjedisit, ju fton të paraqisni të dhëna të tjera të nevojshme dhe të detajuara për projektin e propozuar”.
Në shtator 2016, shoqëritë transferohen në Hollandë, duke krijuar kompaninë “Integrated Energy bv” dhe nga aty sjellin propozimin e tyre bashkë me një studim.
Grupi i kompanive vë në dispozicion të Ministrisë së Mjedisit dokumentacionin shtesë për propozimin e pakërkuar, duke informuar gjithashtu se kjo shoqëri ishte formuar nga kompanitë nismëtare të projektit dhe kishte për qëllim një implementim të rregullt të projektit për Zonën e Trajtimit të Mbetjeve Tiranë.
Të paktën deri në Janar të vitit 2018, emri i Klodian Zotos rezultonte si “Drejtori A” i kompanisë së regjistruar në Hollandë, “Integrated Energy BV”, e cila kishte degë me të njëjtën emër në Shqipëri.
Në Tetor të vitit 2020, kompania “mëmë” e koncesionarit të Sharrës paraqitet “Geogenix bv”, një tjetër shoqëri e regjistruar në zonën off-shore të Amsterdamit.
Kjo kompani, sipas Regjistrit të Pronarëve Përfitues, është në zotërim të tre italianëve; Russelli, Presezzi dhe Ciaffaglione.
Atëherë, çfarë “pronari” të inceneratorit të Sharrës kërkon SPAK-u?
Nëse nga hetimet e kryera deri më tani, prokurorët e posaçëm kanë krijuar dyshimet e arsyeshme se personat e përfshirë në koncesionarin e Tiranës kanë kryer korrupsion dhe pastrim parash, ndoshta duhet nisur nga “pronarët me letra”, për të shkuar me prova e fakte tek “pronarët pa letra”, për të cilët shumëkush në Shqipëri di t’u vendosë emër të përveçëm.
