Ashtu siç edhe kishte ddeklaruar në disa studio televizive, deputeti i rreshtuar pro grupit “Alibeaj”, Dashnor Sula i është bashkuar fushatës së kandidatit të dalë nga “Primaret” e Partissë Demokratike, për bashkinë e Peqinit.
Sula është fotografuar në krah të kandidatit të koalicionit “Bashkë Fitojmë”, Mustafa Pashja teksa ky i fundit vijon fushatën për zgjedhjet lokale të 14 Majit.
“Bashkë me deputetin Z.Dashnor Sula ne nje takim ne fshatin Hasmashaj. Problematikat qe ngriten banoret e ketij fshati ishin te shumta, prej 10 vitesh nuk eshte pare dora e shtetit ne kete zone. Ata meritojn qe problemet e tyre te marin nje zgjidhje dhe ne kete do bëjmë”, thuhet në postimin e Pashjas.
Ndërkohë, sa i përket Sulës, ai ka qenë një ndër të paktët deputetë që ka mbështetur vazhdimisht daljen me një kandidat të përbashkët të PD-së në zgjedhjet e 14 Majit.
