Policia e Lushnjës ka mundur të identifikojë autorin e plagosjes me armë zjarri që ndodhi pasditen e sotme në afërsi të varrezave të fshatit Ballagat.
Mësohet se është shpalur në kërkim për ngjarjen shtetasi me iniciale A.H.
Nga një automjet në lëvizje, ai ka qëlluar me armë në drejtim të 60-vjeçares Bajame Seneja, motra e Kastriot Hasallës, i cili në 2021 vrau kushëririn e tij Romeo Hasalla pas një konflikti për pronat.
Njoftimi i policisë:
Plagosi me armë zjarri në këmbë 60-vjeçaren, identifikohet dhe shpallet në kërkim autori.
Rreth orës 17:20, në afërsi të varrezave të fshatit Ballagat, Lushnjë, është plagosur me armë zjarri në këmbë shtetasja B. S., 60 vjeçe, banuese në Ballagat, Lushnjë, e cila ndodhet në spital, në kujdesin e mjekëve, jashtë rrezikut për jetën.
Shërbimet e Policisë kanë shkuar menjëherë në vendngjarje dhe kanë bërë të mundur identifikimin e autorit, shtetasi A. H. i cili pasi e ka plagosur në këmbë 60-vjeçaren, është larguar nga vendngjarja.
Janë ngritur pika kontrolli në të gjitha hyrje-daljet e qytetit të Lushnjës dhe vijon krehja e zonës me qëllim kapjen e autorit.
Grupi hetimor ndodhet në vendngjarje dhe vijon punën intensive për zbardhjen e plotë të ngjarjes.
