Deri me rekordin e Skukës, Partizani nuk shquhej shumë për shitjet e lojtarëve, por ky fakt nuk e ka penguar të nxjerrë nga gjiri i vet futbollistë, që luajnë me Kombëtaren dhe bëhen elementë kyç të kuqezinjve.
Deri para pak kohësh flamurin e kuq e mbanin lart Ramadani dhe Trashi. Ky i fundit është shkëputur në grumbullimet e fundit, por Ramadanit i janë bashkuar edhe dy “dema” të tjerë, Andi Hadroj dhe Jasir Asani.
Mbrëmjen e djeshme, pas ndeshjes ndaj Polonisë, Asani, Hadroj dhe Ramadani janë takuar me presidentin e Partizanit, Gazment Demi, teksa kanë shkrepur edhe një foto, të cilën e ka publikuar vetë klubi i kuq në rrjetet sociale.
“Çunat e Partizonit. Presidenti Demi takon çunat e Partizanit në Varshavë dhe i përgëzon për lojën e Kombëtares ndaj Polonisë. Andi Hadroj, Jasir Asani dhe Ylber Ramadani janë krenaria e kuqe në ekipin përfaqësues. Shqipëria më e bukur me çunat e Partizanit”, shkruan klubi i kuq, që është i vetmi, i cili dërgoi një futbollist në këtë grumbullim dhe ky fakt është krenari më vete.
