Një sherr i ndodhur brenda një lokali në qytetin e Kavajës mbrëmjen e sotme ka përfunduar me dy viktima.
Personat që kanë ndërruar jetë janë konfliktuar me njëri-tjetrin. Mësohet se 43-vjeçari Edmond Gosa (nga Kavaja) ka plagosur me thikë bashkëmoshatarin e tij Altin Rexha (nga Kukësi), ndërsa ky i fundit i është përgjigjur me armë zjarri.
Motivet për të cilat ka ndodhur ngjarja e rëndë janë ende të paqarta por dy 43-vjeçarët kanë ndërruar jetë, njëri në spitalin e Kavajës dhe tjetri në spitalin e Durrësit.
Ndërkohë, policia ndodhet në vendin e ngjarjes dhe po punon për sqarimin e rrethanave të plota.
Njoftimi i policisë:
Më datë 29.03.2023, në Kavajë, tek kryqëzimi i valutës, ka ndodhur një konflikt midis dy shtetasve, ku shtetasi Edmond Gosa 43 vjeç, ka plagosur me thikë shtetasin Altin Rexha, 43 vjeç, ndërsa ky i fundit ka plagosur me armë zjarri shtetasin Edmond Gosa.
Si pasojë e plagëve të marra të dy shtetasit e përfshirë në konflikt, kanë ndërruar jetë në spital.
Grupi hetimor ndodhet në vendngjarje dhe po punon për sqarimin e rrethanave të ngjarjes.
Në përfundim të veprimeve paraprake në vendngjarje, do të kemi një informacion vijues.
