Grupi “Alibeaj” ka nxjerrë kandidatin e tyre për kryetar bashkie në Tiranë, që do të jetë përballë Erion Veliajt nga PS dhe Belind Këlliçit nga koalicioni “Bashkë Fitojmë”.
Mediat bëjnë me dije se kandidati i fraksionit të Alibeajt, do të jetë Roland Bejko, emri i të cilit u miratua në mbledhjen e sotme të kryesisë.
Ditën e nesërme, në mesnatë, është afati i fundit për regjistrimin në Komisionin Qendror të Zgjedhjeve të kandidatëve për kryebashkiakë dhe këshilltarë. Roland Bejko, garoi për deputet në zgjedhjet e 25 prillit 2021 në qarkun e Gjirokastrës, e nuk mundi që të siguronte as mandatin e tij për në Kuvend.
Roland Bejko do të jetë kandidati i PD se Enkelejd Alibeajt për kryetar në bashkinë e Tiranës. Bejko u zgjodh në mbledhjen e kryesisë, ku përballë kishte Jonila Godolen, por ndaj tij kishte shumicë votash.
Votimi për Bejkon:
Nuk morën pjesë në votim: Gazment Bardhi, Dhurata Cupi, Jorida Tabaku, Ori Nebiaj, Jonila Godole.
Votuan pro Bejkos: Fitim Zekthi, Taulanda Jupi, Kreshnik Collaku, Orjola Pampuri, Xhemal Gjunkshi, Flamur Hoxha, Gazment Koduzi, Enkelejd Alibeaj, Taulant Zeneli, Agron Kapllanaj.
Abstenim në votim: Indrit Sefa, Endri Hasa, Juela Hamati.
Grupi “Alibeaj” pasi mori nga KAS të drejtën për t’u regjistruar në zgjedhjet lokale të 14 majit me logon e Partisë Demokratike, duket se po përjeton një krizë të brendshme, teksa vendimi për të hyrë me kandidatë ose jo, e ka përçarë në tre fraksione.
