Tre persona janë shpallur në kërkim nga policia e Lushnjes pas një ndjekje policore gjatë natës.
Protagonistët janë: R.Ç., 30 vjeç, F.T., 36 vjeç dhe B.M., 66 vjeç, të tre banues në Elbasan.
Ndaj tyre rëndojnë akuzat për veprat penale “Mosbindja ndaj urdhrit të punonjësit të policisë së rendit publik”, “Prodhimi dhe mbajtja pa leje e armëve dhe municionit luftarak” dhe “Falsifikimi i vulave, i stampave ose i formularëve”.
Ngjarja
Burime zyrtare bënë me dije se efektivët e komisariatit të Lushnjës, “bazuar në inteligjencën informative se disa shtetas që qarkullonin me një automjet kishin planifikuar të kryenin vjedhje me armë në një banesë në rrethin e Lushnjës, kanë organizuar punën për parandalimin e vjedhjes, kapjen dhe arrestimin e autorëve”.
Sipas të njëjtave burime: në vendin e quajtur “Rotondo e Çermës”, efektivët kanë lokalizuar automjetin e dyshuar dhe i kanë bërë shenjë për të ndaluar. Por drejtuesi i automjetit nuk i është bindur urdhrit të punonjësve të Policisë për të ndaluar dhe ka shtuar shpejtësinë duke rrezikuar jetën e efektivëve që ishin në rrugë, për të ndaluar këtë automjet.
Uniformat blue janë vënë menjëherë në ndjekje të mjetit tip “Benz” i cili po lëvizte me shumë shpejtësi në drejtim të fshatrave të Peqinit. Automjeti ka dalë nga rruga dhe tre shtetasit që udhëtonin në të e kanë braktisur dhe kanë mundur të largohen, duke përfituar nga errësira.
Gjatë kontrollit të automjetit, shërbimet e Policisë gjetën dhe sekuestruan një sasi municioni luftarak. Rezultoi se makina ishte me targa të falsifikuara.
Policia njoftoi se identifikoi dhe shpalli në kërkim personat në bordin e mjetit tip “Benz”.
