Pasuritë e ish-zv/kryeministrit Arben Ahmetaj pasi u vendosën në “sitë” nga Prokuroria e Posaçme, kanë nisur të konfiskohen njëra pas tjetrës.
Paraditja e së premtes pa agjentët e BKH-së, efektivët e Policisë së Vlorës dhe zjarrfikësit, që të zbarkonin në kompleksin rezidencial “Green Coast” në Palasë për të hapur me fvorcë derën e vilës së ish-bashkëshortes së Ahmetajt, Albina Mançka.
Ndërkohë, në mesditë SPAK ka sekuestruar edhe vilën e bashkëjetueses së Ahmetajt, Erjola Hoxha që ndodhet në një resort turistik në Hamallaj.
Vila luksoze në kompleksin “Vala Mar”, që dyshohet se kap vlerën e 1 milion eurove është sekuestruar në kuadër të hetimeve që lidhin Arben Ahmetaj me aferën e inceneratorëve.
Ish-krahu i djathtë i Edi Ramës dhe bashkëjetuesja e tij aktuale nuk e kishin deklaruar pronën, por në një kallëzim të dorëzuar në SPAK nënvizohet se vila është dhuratë nga koncesionari i inceneratorëve, Klodian Zoto.
Më 9 mars, agjentët e BKH ushtruan kontrolle në vilat e Ahmetajt, duke sekuestruar 30 mijë euro edhe dokumentacionin për arredimin e katër pronave.
Identifikimi i pronave fizike e veçanërisht vilave, si dhe marrja e informacionit ne mos të dhënave dokumentare që provojnë shumën e investuar si në ndërtimin ashtu edhe të arredimit të tyre nga Ahmetaj dhe familjaret e tij që përbën një provë që ish-ministri po hetohet për pastrim parash.
Vetë Ahmetaj ka qenë i pranishëm në momentin që efektivët i kanë bastisur vilën bashkëjetueses së tij Erjola Hoxhaj, pasi ish-zv/kryeministri jeton aty.
Ahmetaj është paraqitur në vilën në Hamallaj rreth orës 12:15-12:00 të 9 marsit, ndërsa efektivët kishin nisur kontrollin e banesës. Ai ka qenë i pranishëm kohës që është ushtruar kontrolli.
Më 15 mars Ahmetaj depozitoi në Apelin e GJKKO një padi, ku i cilëson të paligjshme kontrollet që janë bërë nga Byroja Kombëtare e Hetimit dhe SPAK në vilat në pronësi të bashkëjetueses së tij dhe ish gruas.
Sipas tij, kontrolli në një prej vilave minimalisht është anti-kushtetues pasi nuk është marrë leje nga Kuvendi duke qenë se ai është deputet dhe jeton aty.
Sipas Ahmetaj njëkohësisht bashkëjetuesja nuk është informuar paraprakisht për të pasur praninë e një mbrojtësi ligjor.
Në ankimin e Ahmetajt thuhet se banesa e znj.Hoxha kontrollohet vetëm për shkak të lidhjes që ka me të sepse ai është person nën hetim.
“Si përfundim, duke kërkuar sende që lidhen me veprën/veprat penale që dyshohet se ka kryer z. Arben Ahmetaj (znj. Hoxha nuk përfshihet në rrethin e subjekteve që Prokuria e Posaçme ka kompetencë për t’i hetuar – neni 75/a i KPP), në banesën në pronësi të znj. Erjola Hoxha, si prokuroria, ashtu edhe gjykata, kanë qenë të ndërgjegjshme për lidhjen e tyre në bashkëjetesë; pra, duke vendosur të kontrollonin banesën e znj.Hoxha, ato ishin të ndërgjegjshme që po kontrollonin banesën e deputetit Ahmetaj pa mandat kontrolli, në cenim të Kushtetutës dhe të ligjit procedural”, thuhet në vendim.
Gjithashtu në ankimim nënvizohet se kontrollet e pabazuara në prova kanë cënuar dinjitetin njerëzor në zonjës Hoxha, shkeljen e privatësisë, si dhe janë në kundërshtim me Konventën Evropiane të të Drejtave të Njeriut.
“Zonjës Hoxha nuk iu garantua e drejta për të pasur praninë e një personi të besuar ose një mbrojtësi të zgjedhur para se të fillonte kontrolli i banesës. Ajo nuk kishte në dispozicion asnjë mjet komunikimi me të cilin të kontaktonte avokatët e saj, pasi telefoni iu sekuestrua menjëherë”
Në ankim kërkohet gjithashtu dhe shpallja e paligjshme e modaliteteve të ekzekutimit të kontrollit personal të partneres së tij dhe banesës, pasi “procedura e zbatuar nga hetuesit e BKH ka cenuar lirinë e zonjës E. H. në kundërshtim me ligjin, dinjitetin njerëzor të saj, të drejtën e mbrojtjes ligjore të çiftit bashkëjetues dhe privatësinë e komunikimeve elektronike”, nënvizohet më tej.
