Candel Lecce është një nga femrat më të njohura të rrjeteve sociale në Argjentinë si “influencer” me shumë peshë por ditët e fundit ajo është bërë e njohur edhe jashtë kufijve për shkak të një deklarate “bombë” që vendos në qëndër të vëmendjes sulmuesin Mauro Icardi.
Sipas Candel, sulmuesi i Galatasaray i ka dërguar shumë mesazhe me përmbajtje të rëndë duke e ngacmuar seksualisht, ndërsa shton se shpesh herë ai ka ndryshuar tekste, qendrime dhe ide duke e futur në një krizë të thellë mendore.
“Nuk e di nëse një gjë e tillë është normale në botën e spektaklit por unë kam marrë vazhdimisht mesazhe prej tij. Kam heshtur deri tani por nuk dua ta bëj më një gjë të tillë sepse këto janë ngacmime seksuale.
Më ka thënë se po kalonte momente të vështira prandaj kërkonte mbështetjen time. Njerëzit duhet të dënohen për gjëra të tilla që ndodhin në internet sepse unë kam kaluar një moment kritik dhe m’u desh të ndiqja edhe disa seanca te psikologu”, deklaron Lecce në një intervistë për programin televiziv “Mitre Live”.
Kjo deklaratë pritet t’i hapë jo pak telashe sulmuesit argjentinas, prej pak kohësh të rikthyer në krahët e bashkëshortes Wanda Nara.
