Kreu i Drejtorisë së Policisë së Tiranës doli këtë të mërkurë në një konferencë për shtyp ku njoftoi goditjen e dy grupeve kriminale me 24 anëtarë që kishin përqendruar aktivitetin e tyre në shpërndarjen e drogës (kryesisht kokainë) pranë shkollave dhe klubeve të natës në kryeqytet.
Pasi zbuloi detaje nga operacioni me 20 të arrestuar, Vocaj, u vu në vështirësi nga gazetarët, të cilët i drejtuan pyetje duke vendosur në dyshim aftësinë e uniformave blu për të zbardhur ngjarjet e renda kriminale, si atentatet dhe maskara e “Don Boskos”, që ende nuk kanë autorë.
I pyetur drejtpërdrejte për ecurinë e hetimeve lidhur me ngjarjen e ndodhur mbrëmjen e së dielës së 12 Marsit në “Don Bosko” ku breshëritë e dy kallashnikovëve u zbrazën mbi lokalin e vëllait të Fatjon Muratit (Ylli Murati), Vocaj nuk mund të japë një përgjigje konkrete.
Pavarësisht se nga sulmi me armë mbeti e vdekur një e pafajshme, më konkretisht banakierja 58-vjeçare Mimoza Paja dhe u plagosën 5 qytetarë të tjerë, përfshi xhaxhain e Muratit, kreu i policisxë së Tiranës nuk di të thotë nëse autorët do të vihen para përgjegjësisë.
Për ta bërë më të besueshme tezën se policia është në detyrë, Vocaj u shpreh se ka ngritur një grup hetimor dhe se ka informacione për persona konkretë, por e mbrojti paaftësinë për të goditur krimin që po merr jetë të pafajshmish, duke nënvizuar se nuk mund të zbulojë detaje për shkak të sekretit hetimor.
“Vazhdon të funksionojë një grup hetimor nën drejtimin e Prokurorit, i cili do të marrë kohën e nevojshme. Policia ka informacione edhe për persona konkretë të përfshirë në këtë ngjarje, por për shkak të sekretit hetimor nuk mund të japim detaje, por kur të kemi përparime do ia bëjmë me dije mediave dhe publikut”, tha ai.
Kujtojmë se ngjarja ndodhi më 12 mars, në lokalin e Fatjon Muratit ku humbi jetën banakierja Mimoza Paja, si dhe u plagos xhaxhai i Fatjon Muratit dhe 5 persona të tjerë, përfshirë dhe mbesën 10 vjeçe e viktimës që mori plagë në dorë.
Ndërkohë, në fshatin Likmetaj ekzekutorët dogjën makinën tip “BMW” që përdoren në atentat.
