Një shtetas shqiptar (rreth 40-vjeç) është arrestuar në Spanjë, pasi ka tentuar të vrasë në mënyrë makabre një të ri spanjoll, pas një sherri mes tyre në një klub nate.
Mediat vendase raportojnë se incidenti i rëndë ka ndodhur në klubin e natës “Jaleo” në sheshin “La Hernán Cortés de Castelló”. Mësohet se shqiptari, i cili ndodhet në paraburgim pasi akuzohet për veprën penale “të vrasjes së mbetur në tentativë”, i ka prerë fytin me një gotë qelqi spanjollit.
Ngjarja ka ndodhur të shtunën rreth orës 14:30, kur pas një përleshje brenda ambienteve të klubit, i arrestuari përballë britmave të të pranishmëve ka sulmuar viktimën, i cili ka shpëtuar për pak.
Ajo që ka habitur klientët e lokalit dhe hetuesit është se shqiptari u largua nga lokali duke ecur, i vetëm, me duart, shpinën dhe qafën tërësisht të gjakosura. Ai është nisur drejt rrugës Pescadores, i ndjekur nga një dëshmitar, i cili ka pasur guximin ta incizojë në video me celularin e tij në mënyrë që të regjistrohet imazhi dhe veshja e tij, siç kanë shpjeguar disa të pranishëm. Teksa po largohej, i arrestuari, i cili kishte veshur një xhaketë lëkure të lagur me gjak, përsëriste fjalët: “Nuk kam bërë asgjë”.
Si Policia Kombëtare ashtu edhe ajo Vendore morën njoftime të shumta dhe falë pranisë së bollshme të policisë me rastin e festës së Magdalenës, paraqitja e agjentëve ishte e menjëhershme, duke rrethuar sheshet dhe rrugët lokale, për të bërë të mundur arrestimin e agresorit shqiptar.
Operacioni
Viktima është trajtuar nga Shërbimi i Kujdesit Mjekësor Urgjent (SAMU) dhe është transferuar në Spitalin e Përgjithshëm, ku i është dashur të operohet si pasojë e një plage të thellë që ndodhej vetëm disa centimetra nga arteria karotide, e cila do t’i kishte shkaktuar pothuajse me siguri vdekjen e menjëhershme.
Analizat e kryera rezultuan se ai kishte kristale të mbetura nga gota e qelqit, brenda fytit.
Autori u arrestua në rrugën “Doctor Ferran” dhe u transferua në qelitë e komisariatit. Pritet që në orët në vijim shqiptari të dalë para togave të zeza në gjykatë.
