Një video e postuar nga reperi problematik Kleviol Ahmetaj në rrjetin “Tik Tok”, ku ai ishte pasagjer në një automjet tip “Ferrari” që drejtohej nga personazhi i njohur i rrjeteve sociale Aleks Vishaj dhe udhëtonin me shpejtësi deri në 307 km/h në tunelin e “Kalimashit”, shkaktoi reagime të shumta në publik.
Në videon që filmohet nga Ahmeti, ata tregojnë videon për ndjekësit e tyre shpejtësinë e frikshme me të cilën po lëvizin në tunel, në drejtim të qytetit të Kukësit, dhe në një moment rrezikojnë të përplasen me një makinë tip “Mercedes Benz” që ndodhet përpara tyre.
“Aleks na vrave, të kam vëlla. Bravo Aleks, bravo”, dëgjohet t’i thotë reperi nga Lushnja, mikut të tij që drejton mjetin dhe pas frenimit, shmang një aksident që mund të kishte rezultuar fatal me atë shpejtësi.
Videoja bëri xhiron e rrjetit, por shqetësues ishte fakti se të rinjtë në “Tik Tok” mbështesnin veprimin e Vishajt dhe Ahmetit, kur nuk kishte kaluar ende një javë nga aksidenti pranë TEG, ku humbën jetë Klevis Ruçaj, Erisilda Abedini dhe Sikela Përroj, teksa udhëtonin me një “Audi A8” me shpejtësi skëterrë.
Policia e Shtetit është përpjekur të marrë rolin e protagonistes në të gjithë këtë histori, duke reaguar tre ditë pas publikimit të videos në fjalë.
Ishin blutë e kryeqytetit ata që njoftuan mbrëmjen e kësaj të premte se kishin kryer shoqërimin e Aleks Vishajt në komisariat dhe se e kanë gjobitur personazhin në fjalë me 100 mijë lekë gjobë.
“Pas publikimit në rrjetet sociale, të një videoje në të cilën shfaqej një automjet që qarkullonte me shpejtësi 305 km/h, Policia Rrugore e Tiranës ka intensifikuar punën për identifikimin e automjetit dhe të drejtuesit të tij. Në bazë të pamjeve filmike të siguruara, është identifikuar dhe ndaluar automjeti tip “Lamborghini” me drejtues shtetasin A. V., të cilin e Policia e ka shoqëruar në Komisariat. Ndaj drejtuesit të automjetit u mor masë administrative 100 000 lekë të rinj”, njoftoi policia.
Për më tepër uniformat blu u “mburrën” se kanë bllokuar mjetin tip “Ferrari” të Vishajt, për të cilin mediat angleze raportojnë se e financon jetën e tij të luksit nëpërmjet grabitjeve dhe trafikut të drogës.
Policia për më tepër publikoi edhe një video nga momenti kur kryen shoqërimin e Vishajt, por personazhi i rrjeteve sociale ka hedhur në tokë propagandën e tyre.
Aleks Visha gjatë kohës që shoqërohej nga policia ka publikuar një video po në rrjetin social “Tik Tok”, ku shfaqet në drejtimin e “Ferrarit” të tij me muzikë të lartë në sfond, ndërsa para dhe pas ka motorë dhe makina të uniformave blu që e shoqërojnë.
Sikur të mos mjaftonte fakti që përdor celularin në timon, në një kohë kur disa efektivë ndodhen para dhe pas tij, Vishaj e ka bërë policinë të duket edhe më qesharake, pasi gjatë kohës që filmon përshëndet edhe njerëz në rrugë.
LEXO EDHE:
VIDEO/ “Na vrave”, Aleks Vishaj dhe Cllevio me shpejtësi 300 km/h në tunelin e Kalimashit
VIDEO/ Qarkullonte me 305 km/h, shoqërohet në polici Aleks Vishaj
