Berisha prezanton kandidatin e PD: Mirdita dhe Shqipëria pret ndryshimin, kthesën, fitoren
Një tjetër kandidat i dal nga procesi i “Primareve” në PD dhe përfaqëson alternativën e opozitës shqiptare përballë emrave të përzgjedhur nga Rama për zgjedhjet lokale të 14 majit, është prezantuar mbrëmjen e sotme nga Sali Berisha.
Lideri i opozitës u ndal në bashkinë e Mirditës, ku theksoi se ka shkuar ballëhapur dhe krenar për t’iu prezantuar qytetarëve Albert Melyshin si kandidatin që ka fituar më herët besimin e tyre paraprak.
“Ky entuziazëm kjo pritje është dëshmi e vizionit tuaj për fitoren, dëshmi e energjisë tuaj të pashtershme, e dashurisë tuaj për Mirditën, vendosmërisë tuaj për ti dhënë Mirditës dhe Shqipërisë atë që pret, ndryshimin, kthesën, fitoren. Unë sot tek ju kam ardhur për të paraqitur kandidatin e PD-së për qytetar të parë të Rrëshenit, Albert Melyshi. Vij ballëhapur, krenar sepse Albert Melyshi për herë të parë është kandidati juaj, i votës tuaj, i besimit tuaj”, tha Berisha.
Në vijim të fjalës së tij Berisha nënëvizoi se kur kërkoi të rikthehej si kryetar i PD kuptoi nga takimet me bazën se demokratët kërkonin të përfaqësoheshin nga personazhe që gëzojnë besimin e tyre në rangun vendor por edhe në lidhje me kandidatët për deputetë.
Ndaj duke dëgjuar fjalën e tyre, sipas liderit opozitar sot kemi në garë për 61 bashkitë e vendit emra si ai i Melyshit, që gëzon mbështetjen e plotë të mirditorëve.
“Në shtator të 2021 ne u gjetëm në një situatë si asnjëherë, një forcë tjetër politike. Unë erdha këtu, shkova e takova demokratët kudo, dhe ata me një pjekuri të jashtëzakonshme politike kërkuan që të zgjidhnit vetë kryetarët, drejtuesit e partisë. Të zgjidhnit vetë qeveritarët vendorë, kandidatët për deputetë.
Çfarë po kërkonit ju? Po kërkonit që PD të vendoste lirinë brenda saj në piedestalin që meriton dhe ne e bëmë këtë. Sot kudo ku shkoj unë ne kemi kandidatët e lirisë. Albert Melyshi është kandidati lirisë së mirditorëve, nuk është i Sali Berishës, edhe pse unë e mbështes me të gjithë forcën, si edhe ju, nuk është as i kryesisë”, nënvizoi kryedemokrati.
Sipas Berishës, përballë kandidatëve të “Primares” do të jenë emra të zgjedhur nga Edi Rama, por që nuk gëzojnë besimin e socialistëve të ndershëm dhe qytetarëve që kërkojnë të përfaqësojnë
“Në këtë proces ne shënuam një hov të madh në hapësirën e lirisë. Krahasoni Albert Melyshin ju me atë kandidatin e dajakut. Mirë nuk më vjen që e them këtë, por kjo është e vërteta. Sepse ai nuk është i socialistëve, por i Edi Ramës, prandaj ndodh ajo.
Isha dje në Vaun e Dejës, por kush është kandidati tjetër, kryetari i PS-së. Çfarë kishte ndodhur me të? E kishte marrë Tom Doshi me koncesion. Dua të them me këtë se kandidatët tanë nderojnë çdo qytetarë të Mirditës, demokrat, socialist dhe të paparti. Ju garantoj se kjo praktikë e konsoliduar, kjo praktikë do ti bëjë ata të përulen përulur para kush, shërbëtorë të tuaj, do të bëjë që ata ta përkushtohen me të gjitha forcat qytetarit dhe jo kryetarit. Dhe ky është përfaqësimi në demokraci dhe liri”, theksoi ai.
