Historia e përndjekjes së një vajze të mitur në Croydon të Angisë, ka përfunduar me një dënim prej 8 muajsh pas hekurave për një 22-vjeçar shqiptar.
Ngjarja e regjistruar në Londrën jugore ka shokuar autoritetet britanike, pasi i riu shqiptar Erson Sinaj ka përndjekur pa mëshirshë një vajzë 11-vjeçare, pasi fillimisht e ka parë në park teksa e mitura ecte me nënën e saj.
Sinaj u fiksua pas vajzës dhe sipas mediave lokale vazhdoi një fushatë katër-ditore përndjekje të shoqëruar me veprime shqetësuese për familjes e të miturës.
Sinaj u shfaq vazhdimisht para banesës së 11-vjeçares dhe nëna e saj dyshoi fillimisht se synimi i tij ishte të grabiste shtëpinë e tyre, por më vonë kuptoi se fiksimi i Sinajt ishte vajza e saj.
Kjo pasi, 22-vjeçari këmbëngulte të trokiste në derë dhe të qëndronte jashtë dritares së vajzës gjatë natës. Ky veprim i tij vijoi edhe pasi policia dhe fqinjët e kishin udhëzuar të largohej.
Pas marrjes në pyetje në polici, Sinaj shprehu besimin se kishte të drejtë të trokiste në derë, duke pretenduar se kishte parë një vajzë që i pëlqente në park.
Ai këmbënguli se mes tyre kishte një shprehje të ndërsjelltë dashurie dhe se askush nuk mund ta ndalonte që ta përndiqte atë.
Gjykatësi Simon Mayo i përshkroi veprimet e Sinajt si të ardhura nga një “dëshirë për të krijuar një marrëdhënie me këtë vajzë” dhe shprehu shqetësimin për refuzimin e tij për të pranuar se sjellja e tij ishte e gabuar.
Besimi i palëkundur i Sinajt në një lidhje të ndërsjellë me vajzën e mitur, pavarësisht moshës së saj, është konsideruar “thellësisht shqetësues” nga autoritetet.
Nëna e vajzës ka përjetuar tmerr, me gjumin e ndërprerë dhe ankth të madh për gjendjen e vajzës së saj si pasojë e përndjekjes së Sinajt.
Sipas prokurorit Sebastian Cox, Sinaj është kthyer në shtëpinë e vajzës edhe pas paralajmërimit nga policia, duke vazhduar të trokasë në derë dhe duke u përpjekur të mbante kontakte me të.
Sinaj, pa një adresë fikse, u deklarua fajtor për ndjekje dhe shkaktim të alarmit apo shqetësimit serioz.
Krahas dënimit me tetë muaj burg, Sinajt i është shqiptuar edhe masa e ndalimit që të mos kontaktojë me vajzën apo familjen e saj dhe të mos afrohet më pranë banesës së tyre.
