Partia Lëvizja për Zhvillim Kombëtar (LZHK), e drejtuar nga deputeti Dashamir Shehi ka kërkuar në KQZ, që të ndryshojë emrin në Lëvizja Progresiste për Zhvillim Kombëtar.
Kërkesa është paraqitur nga përfaqësuesi i këtij subjekti politik, Fabian Topallaj.
Në lidhje me këtë kërkesë, kreu i KQZ, Ilirjan Celibashi, pasi ka shqyrtuar rastin në fjalë, është shprehur se partia do të regjistrohet në zgjedhje me të dhënat që janë në dokumentacionin e regjistrit të Gjykatës së Tiranës.
Pra sipas vendimit të Celibashit, ndryshimi i emrit nuk është i mundur dhe nuk ka për të ndodhur dy muaj para zgjedhjeve lokale të 14 majit, ku LZHK e Dash Shehit do të dalë në koalicion me Bindjen Demokratike të Astrit Patozit.
“Emri i Partisë dhe të dhënat e tjera do të jenë ato sipas dokumentacionit të regjistrit të Gjykatës së Tiranës”, është shprehur Celibashi.
