Rritja e frikshme e inflacionit dhe qëndrimi në vend numëro i pagave dhe pesnioneve, ka bërë që qytetarët shqiptarë të mos përballojnë dot më as shpenzimet për ushqimet e përditshme.
Duke marrë në konsideratë të ardhurat mujore, ata tregojnë se hasin vështirësi në përballimin e jetesës, pasi çmimet e produkteve si bulmeti dhe perimet janë rritur frikshëm.
“Ja tre domate mora unë. Ça të bësh pensionet e ulëta, vetëm ça na ndihmojnë fëmijët”, thekson një e moshuar, e cila pranon se pa dërgesat e parave nga fëmijët emigrantë nuk do t’ia dilte dot mbanë për të mbajtur frymën gjallë.
“Po vështirë, me 80 mijë lekë pension. Tani pagova 80 mijë lekë vetëëm dritat, ça do hamë ne dy pensionistë”, u shpreh një tjetër.
Inflacioni i lartë i ka prekur ndjeshëm familjet, ndërsa shpenzimet e larta për energjinë dhe mjekimet për shëndetin po kthehen në një sfidë gjithmonë e më të pamundur për t’u përballuar.
“Unë marr 100 mijë lekë. Unë marrë ilaçe 50 mijë. Me 50 mijë unë nuk paguaj dot as drita, as ujë asgjë. Ja të marrësh një kile gjizë 2500 lekë. Shumë shtrenjtë”, thotë një pensioniste.
Qytetarët tregojnë se çmimet rriten vazhdimisht, ndërsa ata hasin vështirësi të mëdha në përballimin e jetesës.
“Cdo ditë rriten. 1 mijë lekë është spinaqi me 1500 lekë sallata”, shprehet një e moshuar.
Edhe ekspertët e ekonomisë vazhdimisht kanë ngritur alarmin mbi efektet e inflacionit të lartë. Sipas të dhënave, çmimet në Shqipëri janë të barabarta me çmimet e BE e në produkte specifike edhe më të larta, ndërsa vendet e rajonit kanë çmime më të ulëta.
