Kreu i Policisë së Shtetit, Muahmet Rrumbullaku dhe ministri i Brendshëm Bledi Çuçi kanë njoftuar ditën e sotme “ngrirjen” e përkohshme të strukturave vendore të Krimit Ekonomik, duke e argumentuar vendimin e tyre me dështimin e drejtuesve për të përmbushur pritshmëritë.
Sipas tyre, strukturave u ka munguar efikasiteti dhe nuk kanë përmbushur pritshmëritë në luftën kundër evazionit fiskal, paligjshmërive në fushën ekonomike, apo goditjen e korrupsionit.
Pezullimi i të gjithë shefave të Krimit Ekonomik që Rrumbullaku ka firmosur do të qëndrojë në fuqi deri në hyrjen në fuqi të strukturës së re të Policisë së Shtetit.
Gjatë takimit të zhvilluar nga Ministri i Brendshëm me Rrumbullakun, Çuçi dha edhe porosi të prera për çdo drejtues vendor të Policisë, duke kërkuar luftë pa kompromis kundër kultivimit të kanabisit
Duhet theksuar se ky vendim vjen dy muaj para zgjedhjeve lokale të 14 majit, proces për të cilin Çuçi ka kërkuar sot angazhimin maksimal të strukturave inteligjente dhe ato të Rendit të Policisë.
