Edi Rama mblodhi paraditen e kësaj të enjte Kryesinë e PS, pak orë para se KQZ të mblidhej për të vendosur mbi regjistrimin e partive politike, duke diskutuar në themel mbi përgatitjet për zgjedhjet lokale të 14 majit dhe emrat e kandidatëve socialist për 61 bashkitë e vendit.
Në daljen për mediat pas një orë e gjysmë mbledhje Rama e konfirmoi se e ka gati ekipin me të cilin sipas tij do të fitojë ndaj opozitës, që e konsideroi të dobët dhe jo të denjë për të dalë në fushë.
Zyrtarisht kandidatët e selisë rozë pritet të zbulohen më 25 Mars, në mbledhjen e radhës të Kryesisë, ndërsa në listë pritet të ketë një shumicë kryebashkiakësh të rikonfirmuar nga Rama.
“Zyrtarizmi përfundimtar do të bëhet para se të regjistrohen zyrtarisht kandidatët. Por në pika të përgjithshme e dimë se kush do të jetë skuadra. Mendoj që do fitojmë shumë bindshëm, por fitorja kur ke përballë kundërshtarë të tillë, në aspektin aritmetik është minimumi. Çështja është të shkosh përtej fitores aritmetike. Këto lloj situatash rrezikojnë shumë të të shkëpusin nga njerëzit”, u shpreh kryeministri teksa doli nga selia e PS.
Teksa vetë Rama refuzoi t’u përgjigjej gazetarëve për emra të përveçëm, në media kanë rrjedhur informacione nga mbledhja për disa nga kandidatët që Rama ka ndërmend të kandidojë.
Kështu, A2 CNN duke iu referuar burimeve bën me dije se bashkia e Vlorës pritet të ndahet mes dy emrave, Ermal Dredhës dhe ish-deputetit Fate Velaj.
Me kryebashkiakun aktual të qytetit bregdetar, Dritan Leli që është shpallur prej kohësh “non-grata” nga PS, e të cilin Rama e konsideron “të vdekurin e Bahskisë”, duket se kampi rozë ka kaluar në sitë disa emra.
Përveç Fate Velajt që është miku i kryeministrit dhe Dredhës që përfaqëson Shqipërinë si ambassador në Dubai, në lojë është edhe Odise Moçka.
Emri i avokatit të Shtetit gjithashtu përflitet në korridoret e Partisë Socialiste si kandidatë për kryetar bashkie në qytetin e Vlorës.
Vetë Dredha, Moçka apo dhe Velaj që është shfaqur në krah të Ramës në çdo vizitë të kryeministrit në qarkun jugor, asnjëherë nuk kanë komentuar në lidhje me këto zëra.
Ndërkohë, mësohet se Moçka dhe Dredha kanë transferuar nga Tirana në Bashkinë e Vlorës gjendjen civile ditët e fundit, duke u bërë zyrtarisht banorë të qytetit bregdetar, çka plotëson kriteret e vendosura nga Partia Socialiste për kandidatët e saj, që duhet të jenë banorë të bashkisë ku do të provojnë të fitojnë më 14 maj.
