Anija “Lissus”, do të jetë për herë të parë pjesë e një grupi operacional, nën komandën e Komandantit të Forcës Detare të NATO-s, e cila do të shërbejë për njohjen e situatës detare dhe ndalimin e aktivitetit të paligjshëm në Detin Mesdhe.
Në ceremoninë e përcjelljes së ekuipazhit, zv.Shefja e Shtabit të Përgjithshëm të FA gjeneral major Manushaqe Shehu u shpreh: Forca Detare rikthehet të kontribuojë si faktor i rritjes së sigurisë detare, pas një angazhimi të suksesshëm 3 vjeçar nga viti 2016-2019, në aktivitetin e NATO-s Sea Guardian në detin Egje, ku bëri të mundur dhënien e ndihmës mbi 1800 personave, në rrezik për jetën.
“Ky është një tregues i qartë për rolin e Shqipërisë si një faktor stabiliteti dhe sigurie në rajon dhe më gjerë. Ndryshe nga misioni i kryer në vitin 2016-2019 në detin Egje, që kishte karakter humanitar, kjo është hera e parë që Forca jonë Detare angazhohet në një operacion të mirëfilltë të rritjes së sigurisë detare”, u shpreh gjeneral major Manushaqe Shehu.
Më tej në fjalën e saj, zv.Shefja e Shtabit të Përgjithshëm të FA u shpreh e bindur se efektivi i anijes do të tregojë profesionalizëm, përkushtim dhe korrektësi gjatë kryerjes së detyrave.
