Tre shqiptarë janë shpallur fajtorë, duke u dënuar me nga një vit e gjysmë burg në Gjykatën e Lartë të qytetit të Bristol, pasi ishin arrestuar në një fabrikë të madhe dhe të sofistikuar kanabisi.
Gerald Dosku (26 vjeç) nga Kettlethorpe Road, Wakefield, Keli Biçaku (35 vjeç) dhe Bledar Bardhi (32 vjeç) të dy pa adresë fikse, u paraqitën në Bristol Croën Court ditën e djeshme.
Gjykata dëgjoi sesi, të premten, më 2 dhjetor, oficerët zbuluan një fabrikë kanabisi brenda një magazine në pronën industriale Coates, në Southfield Road, Nailsea.
Kanabisi i gjetur mund të kapte në rrugë një vlerë prej gati 200,000 £.
Policia veproi pasi mori një telefonatë nga anëtarët e publikut, ku njësia e specializuar e dronëve ishte e para në vendngjarje. Ajo çka pushtoi faqet e para të mediave britanike pas këtij aksioni për bastisjen e një “ferme kanabisi” ishte se tre shqiptarët tentuan të fshiheshin duke u ngjitur sipas çatisë së ndërtesës në përpjekje për të shmangur arrestimin.
Megjithatë ndërtesa u rrethua shpejt dhe kur sipër tyre panë dronët që i filmonin, tre shqiptarët u dorëzuan dhe zbritën, në mënyrë që efektivët t’iu vendosnin prangat.
Oficeri i policisë së Avon dhe Somerset, Michael Clarke tha: “Ky ishte një organizim i madh dhe i sofistikuar. Droga dhe krimet e lidhura me to, kanë aftësinë të shkaktojnë një dëm të madh dhe madje të shkatërrojnë jetë. Është fantastike që kemi mundur të prishim operacionin e tyre kriminal, falë syve të mprehtë të komunitetit lokal”.
