Deputetja e Partisë Demokratike, Jorida Tabaku, e cila është rreshtuar në grupin “Alibeaj” dhe ishte pjesëmarrëse në mbledhjen që ky i fundit zhvilloi në ambientet e një hoteli në Tiranë, pasi Gjykata e Apelit riktheu në Shkallën e Parë çështjen e vulës, mendon se bashkimi i demokratëve mund të realizohet me një vendim politik.
Teksa komentoi ecurinë e procesit përgatitor për zgjedhjet lokale të 14 majit, Tabaku “u dorëzua” përballë faktit se Partia Demokratike nuk mund të gjejë kandidatë më të denjë për të sfiduar Edi Ramën sesa emrat e dalë nga “Primaret” e Berishës.
Ajo tha se çdo kandidat ka të drejtë që të përfaqësohet në zgjedhjet e 14 Majit, me siglën e PD, teksa përmendi rastin e ish-deputetit Igli Cara, duke thënë se është shembulli i duhur për t’u treguar demokratëve pse duhet të dalin të bashkuar në zgjedhje.
“Që nga shtatori kam thënë që PD duhet të jetë bashkë. 3 marsi ka qenë ditë rutinë, pasi nuk i jep zgjidhje një vendim gjykate situatës. Është e pandershme për këto 32 vite. Kam përgjegjësi të madhe politike. Çfarë i duhet një votuesi se çfarë ndodh në politikën e Tiranës? U duhet një kandidat. Ka gjëra më të rëndësishme se pushteti personal. A kemi në një ofertë para PS? Nuk mendoj se ka kandidatë më të mirë se në Durrës se Igli Cara. Nuk është e drejtë që Igli Cara të dalë me një sigël tjetër. Është deputet i kësaj partisë dhe i takon të përfaqësohet nga PD. Kjo kërkon zgjedhje politike dhe vendim politik”, tha Tabaku.
