Nga Boldnews.al
Shteti shqiptar po paguan “qimet e kokës” për akomodimin e mjekëve dhe personelit turk të Spitalit Memorial të Fierit. Megjithëse u konsiderua “dhuratë” nga Erdogani dhe se në atë spital do të punonin edhe personel nga Turqia, shpenzimet për të gjithë benefitet e tyre po përballohen nga buxheti i varfër i shtetit shqiptar. Vit pas viti, faturat e hoteleve për turqit po shtrenjtohen, ku nga një krahasim me vitin 2022 rezulton se çmimi është dhjetëfishuar.
Një “çmenduri” më vete, pasi me kaq para’ sa po shpenzohen për hotele, Shqipëria mund ta ndërtonte vetë një hotel, apo një kapanon për strehimin e tyre. Krahas hoteleve, mjekët turq marrin edhe rroga pesë apo dhjetëfish më të mëdha se shqiptarët, duke detyruar edhe këta të fundit që të emigrojnë në Gjermani. Por atje, nuk ua paguan shteti gjerman hotelin dhe ngrënien, por nga rroga e tyre.
Sipas dokumenteve që disponon BoldNews.al, Spitali Memorial i Fierit ka hapur një procedurë prokurimi me objekt “shërbim hotelerie – akomodimi”. Burimi i financimit janë të shtetit shqiptar, ndërkohë që tenderi pritet të realizohet në ditët në vijim. Por, ajo që bie më shumë sy në gjithë këtë procedurë është vlera tepër e madhe për akomodimin.
Mësohet se fondi limit i kësaj procedure është 121.453.283 lekë, ose plot 1.2 milionë euro. Me kaq para’, mund të bëhej dhe ndërtohej një hotel në afërsi të atij spitali. Megjithatë, tashmë të shpresojmë që të paktën të rritet cilësia në shërbime në atë spital, të cilit i kanë munguar një mori ekzaminimesh apo edhe medikamentesh. Por të paktën, ne nuk kursehemi te mikpritja!
BoldNews.al ka denoncuar edhe në vitin 2022 një procedurë të ngjashme. Në atë kohë, redaksia jonë investigoi një procedurë prokurimi, ku personeli turk do të akomodohej në një hotel me kushte të forta sigurie. Sipas dokumenteve, turqit kishin kërkuar masa shtesë sigurie, madje edhe izolim të vendit që do të qëndrojnë. Por, ky izolim i ka kushtuar këtij spitali plot 150 milionë lekë të vjetra, duke lënë të kuptohet se mes shqiptarëve dhe turqve në këtë spital ka diferenca të mëdha në trajtim.
Në vitin 2022, Spitali Memorial i Fierit finalizoi tenderin me objekt “shërbim i akomodimit të personelit turk”, me fondin limit 32.247.180 lekë pa TVSH. Në atë procedurë mori pjesë firma “ERAL” me ofertë 17.483.800 lekë pa TVSH dhe firma “HAXHI SHAHU” me ofertë 32.239.200 lekë pa TVSH. Oferta e dytë është rreth 50 përqind më shumë se vlera e ofertës së parë. Në dokumentet e këtij spitali shkruhej se është skualifikuar oferta e firmës “ERAL SHPK” pasi nuk plotëson licencën përkatëse ku përcaktohet kategoria dhe niveli i strukturës akomoduese. Pra, personeli turk kërkon një ambient të veçantë qëndrimi, ku mos të ketë persona të tjerë. Madje, të izoluar nga çdokush, kërkesa të cilat ngjasojnë më shumë nga ato të shërbimeve sekrete sesa të mjekëve apo të infermierëve të këtij spitali.
