Studentes së mjekësisë me origjinë shqiptare, Klaudia Lata i është dhënë lamtumira e fundit në Greqi, pasi u gjet e pajetë mes 57 viktimave të tragjedisë së ndodhur në Tempi, ku një tren mallrash dhe treni i udhëtarëve Athinë-Selanik u përplasën teksa lëviznin në të njëjtën trase.
Me lotësh, pranë arkivolit të mbuluar me flamurin grek siç e do ceremonia ushtarake në vendin fqinj, Klaudia Lata u përcoll për në banesën e fundit.
Varrimi i 23-vjeçares u bë me nderime ushtarake sepse ajo studionte në Shkollën Mjekësore Ushtarake SAS në Selanik.
23-vjeçarja ishte një nga pasagjerët e pafatë të trenit “Intercity 62”, teksa ishte ulur në vagonët e parë dhe u vra në çastin e parë që ndodhi përplasja dhe më pas shpërthimi në flakë.
Familjarë, të afërm, miq, pedagogë e studentë ushtarakë morën pjesë në aktin e fundit të dramës së saj në kishën e Agios Dimitrios në Larisa për t’i thënë “lamtumirën” e tyre të fundit dhe nuk munguan lotët në sytë e tyre për humbjen e Klaudias.
Pikëllimi në fytyrat e familjarëve të vajzës ishte edhe më i dukshëm kur u dëgjua marshi funebër nga banda ushtarake dhe kur toga greke rrethoi arkivolin e të ndjerës.
Studentja e mjekësisë ishte një nga 6 shqiptarët të cilët humbën jetën në këtë tragjedi. Të tjerët janë: Ifigjenia Micka, Erieta Molko, Ioanis Xhiollas, Denis Ruçi dhe Pavlin Bozo.
