Rritja e çmimit të ushqimeve të shportës bazë, karburantit dhe qirave në Tiranë, e ka bërë jetën në kryeqytet tepër të vështirë. Kostoja e jetesës është rritur frikshëm, nëse marrim në konsideratë të ardhurat që familjet në Tiranë fitojnë në fund të muajit.
Në një përllogaritje të thjeshtë të kostos së jetesës për një çift të ri, pedagogia Romina Radonshiqi, ka zbuluar se duhen mbi 1 milion lekë për të bërë një jetë mesatare normale dhe mbi 2 milionë lekë në muaj nëse ke edhe fëmijë.
Sipas pedagoges, 2 milionë lekë të vjetra duhen në muaj për të siguruar kushtet bazë të fëmijëve, e për këtë ka raste kur prindërve u duhet që të privojnë disa gjëra nga jeta e tyre.
“Në shifrat që dalin janë të frikshme dhe të bën të kuptosh që jo të gjithë e bëjnë këtë lloj jetese. Me ato shpenzime që ne i konsiderojmë si mesatare, shumë shqiptarë nuk i arrijnë dot. Pjesa më e madhe e çifteve të reja, duan të dalin më vete dhe kjo ka një kosto shtesë.
Kur të ardhurat janë më të vogla se shpenzimet, kjo ka sjellë diferencën. Problemi komplikohet më shumë kur kemi edhe fëmijë dhe të jetosh mirë në nivelin mesatar duhen 2 milionë lekë në muaj. 300 mijë lekë të vjetra duhen për fëmijët dhe prindi sakrifikon veshjen tek vetja”, tha ajo në emisionin “7pa5”.
