Vendimi i Gjykatës së Apelit për ta dërguar çështjen e vulës së Partisë Demokratike në Shkallën e Parë për rigjykim, duke lënë kështu në duart e Enkelejd Alibeajt këtë forcë politike, nuk e ka ndalur Sali Berishën që të dërgojë këtë të hënë në KQZ emrat e kandidatëve për zgjedhjet lokale të 14 Majit.
Siç u bë e qartë ditën e djeshme nga selia blu, pas takimeve të ngjeshura me kandidatët e dalë nga primaret dhe më pas me Këshillin Kombëtar, mes demokratëve u ra doakord që në zgjedhjet e 14 Majit, kandidatët e dalë nga Primaret do të garojnë në koalicion, por jo me Alibeajn dhe Bashën, nëse ata nuk bien dakord të bashkohen.
Ndërkohë në selinë blu kanë nisur herët lëvizjet dhe në një njoftim të shpërndarë për mediat bëhet me dije se Berisha do të dërgojë në KQZ përfaqësuesit ligjorë për regjistrimin e Partisë Demokratike në zgjedhjet e 14 majit.
“Përfaqësuesit ligjor të Partisë Demokratike në KQZ, Ledio Nuraj dhe Franc Nuri pas pak do të depozitojnë dokumentacionin për regjistrimin e PD-së si subjekt zgjedhor në zgjedhjet lokale të datës 14.05.2023 në Komisionin Qendror të Zgjedhjeve”, thuhet në njoftimin e selisë blu.
Kjo lëvizje politike e Berishës vjen një ditë pasi Enkelejd Alibeaj gjithashtu bëri me dije se do të çonte ditën e sotme në KQZ përfaqësuesit e tij ligjorë për regjistrimin e PD në zgjedhje.
Nëse KQZ do të refuzojë regjistrimin e kandidatëve të Berishës ata do të regjistrohen në koalicion ashtu si në 6 mars të viti të kaluar.
Sakaq, Berisha tha dje se grupimi i Alibeajt duhet të pranojë kandidatët e dalë nga “Primaret” dhe se kjo është e vetmja zgjidhje nëse kujtojmë se janë votuar nga pjesa më e madhe e anëtarësisë.
